"*ഞാൻ അബ്രാഹാമിൻ്റെ ദൈവവും യിസ്ഹാക്കിൻ്റെ ദൈവവും യാക്കോബിൻ്റെ ദൈവവും ആകുന്നു* എന്നു അവൻ അരുളിച്ചെയ്യുന്നു; എന്നാൽ അവൻ മരിച്ചവരുടെ ദൈവമല്ല, ജീവനുള്ളവരുടെ ദൈവമത്രേ" (മത്തായി 22:32)
വിശുദ്ധ വേദപുസ്തകത്തിൽ പല അവസരങ്ങളിലായി ആവർത്തിച്ചാവർത്തിച്ച് രേഖപ്പെടുത്തിയിരിക്കുന്ന ഒരു വചനമാണ് ഇത്. അബ്രാഹാമിൻ്റെയും യിസഹാക്കിൻ്റെയും യാക്കോബിൻ്റെയും ദൈവമാണ് താൻ എന്ന് സ്വർഗ്ഗത്തിലെ ദൈവം അഭിമാനത്തോടെ പറയുവാൻ നിരവധി കാരണങ്ങൾ തിരുവചനത്തിൽ നമുക്കു കാണുവാൻ കഴിയും. അവർ തങ്ങളുടെ ജീവകാലമൊക്കെയും ദൈവഭയത്തിലും ഭക്തിയിലും അനുസരണത്തിലും ജീവിച്ച് ദൈവത്തെ പ്രസാദിപ്പിച്ചതുകൊണ്ടാണ് ദൈവം അവരുടെ ദൈവം എന്ന് പരിചയപ്പെടുത്തുവാൻ (വിളിക്കപ്പെടുവാൻ) ലജ്ജിക്കാതിരുന്നത്.
പൂർവ്വ പിതാക്കന്മാരായ ഈ മൂന്നു ദൈവഭക്തരുടെയും ജീവിതത്തിൽ നമുക്കു പൊതുവായി ദർശിക്കാവുന്ന ഒരുപിടി പ്രത്യേകതകളിൽ അഥവാ സാദൃശ്യങ്ങളിൽ ഒന്നുമാത്രം ഞാൻ ഇവിടെ ഓർമ്മപ്പെടുത്തുവാൻ ആഗ്രഹിക്കുന്നു;
ഉൽപ്പത്തി 13:2, 26:13, 30:43 ഈ മൂന്നു വചനഭാഗങ്ങളിൽ വായിക്കുന്നത്, അവർ മൂന്നുപേരും തങ്ങളുടെ ജീവിതത്തിൽ വർദ്ധനവിൻ്റെ അനുഭവം ഉള്ളവരായിരുന്നു എന്നാണ്.
*1) അബ്രഹാം;* ഉൽപ്പത്തി 13:2 "...അബ്രാം ബഹുസമ്പന്നനായിരുന്നു"
*2) യിസഹാക്ക്;* ഉൽപ്പത്തി 26:13 "അവൻ വർദ്ധിച്ചു വർദ്ധിച്ചു മഹാധനവാനായിത്തീർന്നു"
*3) യാക്കോബ്;* ഉൽപ്പത്തി 30:43 "അവൻ മഹാസമ്പന്നനായി..."
മത്തായി 22:32, മർക്കൊസ് 12:27, ലൂക്കൊസ് 20:37 വചനഭാഗങ്ങളിൽ ദൈവം അബ്രാഹാമിൻ്റെയും യിസഹാക്കിൻ്റെയും യാക്കോബിൻ്റെയും ദൈവമാണ്, മരിച്ചവരുടെ ദൈവമല്ല, ജീവനുള്ളവരുടെ ദൈവമത്രേ എന്ന് എഴുതിയിരിക്കുന്നതിൻ്റെ ഒരു കാരണം, അവരുടെ മൂന്നുപേരുടെയും ജീവിതത്തിൽ ജീവൻ്റെ അടയാളമായ വർദ്ധനവ് ഉണ്ടായിരുന്നതുകൊണ്ടാണ്. അബ്രാഹാമിൻ്റെ മക്കൾ വർദ്ധിച്ചുവന്നു അഥവാ മേൽക്കുമേൽ പെരുകി വന്നു എന്നാണ് തിരുവചനത്തിൽ രേഖപ്പെടുത്തിയിരിക്കുന്നത്.
ഗലാത്യർ 3:7,9 വചനപ്രകാരം വിശ്വാസത്താൽ അബ്രാഹാമിൻ്റെ മക്കളായ നമ്മുടെ ജീവിതത്തിലും ജീവൻ്റെ അടയാളമായ ഈ വളർച്ചയും വർദ്ധനവും ഉണ്ടാകണം എന്നുള്ളത് ദൈവത്തിൻ്റെ പദ്ധതിയാണ്.
"അതുകൊണ്ടു വിശ്വാസികൾ അത്രേ അബ്രാഹാമിൻ്റെ മക്കൾ എന്നു അറിവിൻ
അങ്ങനെ വിശ്വാസികൾ വിശ്വാസിയായ അബ്രാഹാമിനോടുകൂടെ അനുഗ്രഹിക്കപ്പെടുന്നു"
വിശ്വാസികളായ നമ്മുടെ ജീവിതത്തിൽ ഉണ്ടാകുവാൻ പോകുന്ന ആത്മിക / ഭൗതിക വർദ്ധനവുകളിൽ ചിലത് ദൈവവചനത്തിൽ നിന്ന് ഞാൻ അക്കമിട്ട് എഴുതാം;
*ആത്മിക വർദ്ധനവുകൾ *
*1) വിശ്വാസത്തിൽ വർദ്ധനവ്*; ലൂക്കൊസ് 17:5, 2 തെസ്സ. 1:3, 2 കൊരി. 10:15,
*2) ദൈവകൃപയിൽ വർദ്ധനവ്*; റോമർ 5:20, 2 കൊരി. 4:15, 1 തിമൊ. 1:14
*3) സ്നേഹത്തിൽ വർദ്ധനവ്*; ഫിലി. 1:9, 1 തിമൊ. 1:14, 1 തെസ്സ 3:12
*4) സ്തോത്രത്തിൽ വർദ്ധനവ്*; 2 കൊരി. 4:15, കൊലൊ. 2:7
*5) അഭിഷേകത്തിൽ വർദ്ധനവ്*; 1 കൊരി 14:4
*6) സഹോദരപ്രീതിയിൽ വർദ്ധനവ്*; 1 തെസ്സ 4:9,10
*7) ഫലത്തിൽ വർദ്ധനവ്*; കൊലൊ. 1:6
*8) കർത്താവിൻ്റെ വേലയിൽ വർദ്ധനവ്*; 1 കൊരി. 15:58
*9) നടപ്പിൽ വർദ്ധനവ്*; 1 തെസ്സ. 4:1
*10) പ്രാർത്ഥനയിൽ വർദ്ധനവ്*; യൂദാ 1:20
*11) പ്രബോധനത്തിൽ വർദ്ധനവ്*; 1 തെസ്സ. 5:11
*12) സമാധാനത്തിൽ വർദ്ധനവ്*; അപ്പൊ.പ്ര. 9:31, 1 പത്രൊ. 1:2
("...നിങ്ങൾക്കു കൃപയും സമാധാനവും വർദ്ധിക്കുമാറാകട്ടെ")
*ഭൗതിക വർദ്ധനവുകൾ*
*1) വസ്തുവകകളിൽ വർദ്ധനവ്*; ഉൽപ്പത്തി 30:30
*2) കൃഷിഫലത്തിൽ വർദ്ധനവ്*; ലേവ്യ. 19:25
*3) ആരോഗ്യത്തിൽ വർദ്ധനവ്*; ദാനിയേൽ 4:22
*4) തലമുറയിൽ വർദ്ധനവ്*; ഉൽപ്പത്തി 47:27
*5) സമ്പത്തിൽ വർദ്ധനവ്*; ഇയ്യോബ് 1:10
*6) ആയുസ്സിൽ വർദ്ധനവ്*; സദൃശ്യവാ. 9:11
("ഞാൻ മുഖാന്തരം നിൻ്റെ നാളുകൾ പെരുകും; നിനക്കു ദീർഘായുസ്സു ഉണ്ടാകും")
*ഒരു ശാപം പോലെ ചിലരുടെ ജീവിതങ്ങളെ ബാധിച്ചിരിക്കുന്ന മുരടിപ്പിൻ്റെ അനുഭവങ്ങളെ മാറ്റി*,
*ചെയ്യുന്നതിലൊന്നിലും ഗതിപിടിക്കാത്ത വൃഥാപ്രയത്നങ്ങളുടെ ചരിത്രത്തെ മാറ്റി*,
*കഴിവും യോഗ്യതകളും ഉണ്ടായിട്ടും അർഹിക്കുന്ന പരിഗണന ലഭിക്കാത്ത കയ്പ്പിൻ്റെ നാളുകളെ മാറ്റി*,
*വരുമാനം കൃത്യമായി കയ്യിൽ വരുന്നുണ്ടെങ്കിലും അവസാനം ഒന്നിനും തികയാതെ ചക്രശ്വാസം വലിക്കുന്ന ഗതികേടു മാറ്റി*,
*ബന്ധുക്കളും സ്നേഹിതരും ഒക്കെ ഉണ്ടായിട്ടും ജീവിതത്തിൽ ഒറ്റപ്പെട്ട അവസ്ഥകളെ മാറ്റി*,
*കൈതൊടുന്നതെല്ലാം നഷ്ടക്കണക്കിൽ മാത്രം അവസാനിക്കുന്ന സ്ഥിരം ഇടപാടുകളുടെ പൊല്ലാപ്പുകൾ മാറ്റി*,
*കടങ്ങളും ബാധ്യതകളുമായി ഒരു നിലയില്ലാകയത്തിൽ കിടന്ന് കൈകാലിട്ടടിക്കുന്ന ഞെരുക്കത്തിൻ്റെ നാളുകൾ മാറ്റി*,
*കേസ്സും കോടതിയുമായി നിയമവ്യവഹാരങ്ങളിൽ പെട്ട് വട്ടംതിരിയുന്ന ചുറ്റിക്കെട്ടുകൾ മാറ്റി*,
*നന്നായി പഠിച്ചിട്ടും, പെടാപാടുപെട്ടിട്ടും പ്രതീക്ഷക്കൊത്ത റിസൾട്ടു ലഭിക്കാത്ത നിരാശ മാറ്റി*
ജീവിതത്തിലെ നിർജ്ജീവ അവസ്ഥകൾ മാറ്റി സമഗ്രമേഖലയിലും വർദ്ധനവിൻ്റെ സമൃദ്ധിയിൽ നിങ്ങൾ വസിക്കുന്ന മാസമായിരിക്കട്ടെ ഈ മാസം എന്ന് കർത്താവിൻ്റെ നാമത്തിൽ അനുഗ്രഹിച്ചു പ്രാർത്ഥിക്കുന്നു.
*ക്രിസ്തുവിൽ സ്നേഹപൂർവ്വം...*
ദൈവദാസൻ ഷൈജു ജോണ്‍
വചനമാരി,ഭോപ്പാൽ,9424400654, 7898211849
*കുറിപ്പ്:*
പ്രാർത്ഥനാ വിഷയങ്ങൾ അറിയിക്കേണ്ടതിനായി വചനമാരി പ്രയർ ഗ്രൂപ്പിലേക്ക് വിളിക്കാവുന്നതാണ്. Mob:09589741414, Ph:07554297672 (തിങ്കൾ മുതൽ വെള്ളിവരെ, രാവിലെ 10മുതൽ വൈകിട്ട് 6വരെ)
