അമേരിക്കയിലെ മിസോരിയയിലുള്ള കൻസാസ് എന്ന പട്ടണത്തിൽ യുവാവായ ഒരു കാർട്ടൂണിസ്റ്റ് ഉണ്ടായിരുന്നു. ജന്മനാ തന്നെ നല്ല ഒരു കലാകാരനായിരുന്ന അദ്ദേഹം അക്കാലത്ത് താൻ രചിച്ച കലാ സൃഷ്ടികള്‍ പ്രസിദ്ധീകരണത്തിനായി വിവിധ മാധ്യമങ്ങള്‍ക്ക് അയച്ചുകൊടുത്തെങ്കിലും അവർ ആരുംതന്നെ അവ പ്രസിദ്ധീകരിക്കുവാൻ തയ്യാറായില്ല. നിരാശനായ ആ യുവാവിനെ അവിടെ ഉള്ള ഒരു ക്രിസ്തീയ സഭ സഹായിക്കുവാൻ തയ്യാറായി. അവരുടെ ചര്‍ച്ചിന്‍റെ പരസ്യവിഭാഗത്തില്‍ ആ യുവാവിനു പ്രവര്‍ത്തിക്കുവാൻ അവസരം കൊടുത്തു. താമസിക്കുവാൻ സ്വന്തമായി ഒരു വീടുപോലും ഇല്ലാതിരുന്ന ആ യുവാവ്, സഭയിലെ പാസ്റ്ററോട് ഒരു മുറി തരണമെന്ന് അപേക്ഷിച്ചു. എന്നാൽ അയാള്‍ക്ക് കൊടുക്കുവാൻ അവിടെ മുറികള്‍ ഒന്നും ഒഴിവുണ്ടായിരുന്നില്ല. എങ്കിലും അയാളുടെ നിസ്സഹായവസ്ഥ കണ്ട പാസ്റ്റർ ചർച്ച് കാമ്പസിന്‍റെ ഒരു കോണിൽ ഉപേക്ഷിക്കപ്പെട്ടുകിടന്ന ഒരു പഴയ മുറി ആ യുവാവിനു താമസിക്കുവാനായി തരപ്പെടുത്തികൊടുത്തു.
പൊടിയും മാറാലയും പിടിച്ച്, പൊട്ടിപ്പൊളിഞ്ഞ ചുവരുകളോടുകൂടിയ ആ മുറി വല്ല വിധേനയും അയാള്‍ ഒരുക്കി എടുത്തു. ആ മുറിയില്‍ യുവാവിനു മുമ്പേ സ്ഥിരതാമസമാക്കിയിരുന്ന മറ്റൊരു കൂട്ടര്‍ കൂടി ഉണ്ടായിരുന്നു, കുറേ ചുണ്ടെലികള്‍. അയാള്‍ അവയെ ഓടിച്ചു കളയുവാന്‍ ശ്രമിച്ചു എങ്കിലും, വിജയിച്ചില്ല. തുടക്കത്തില്‍ അവ അയാള്‍ക്കു ശല്ല്യമായി തോന്നിയിരുന്നെങ്കിലും, ക്രമേണ ആ ചുണ്ടെലികളുടെ സാന്നിധ്യവും അവ ഉണ്ടാക്കുന്ന ശബ്ദങ്ങളും ഒക്കെ ആയി ആ യുവാവ് പൊരുത്തപ്പെട്ടു. ചുണ്ടെലികളുടെ ശൈലിയും ഭാവവും സൂക്ഷ്മമായി വീക്ഷിച്ച ആ യുവ കാര്‍ട്ടൂണിസ്റ്റിന്‍റെ മനസ്സില്‍ ഒരു ഭാവന ഉണര്‍ന്നു. വിവിധ ഭാവങ്ങളില്‍ എലിയുടെ കാര്‍ട്ടൂണ്‍ ചിത്രം വരച്ച അയാള്‍ അതിന് ഒരു പേരിട്ടു, 'മിക്കി മൗസ്' (Micky Mouse). ഇന്ന് ലോകമെങ്ങുമുള്ള കുട്ടികളുടെ ഇഷ്ട കഥാപാത്രമായ മിക്കി മൗസ് പിറന്നത് ഇങ്ങനെ ആണ്. കാലിഫോര്‍ണിയയിലുള്ള ഡിസ്നി ലാന്‍റ്, ഫ്ളോറിഡയിലുള്ള ഡിസ്നി വേള്‍ഡിന്‍റെയും ഉടമസ്ഥനായ 'വാള്‍ട്ട് ഡിസ്നി' (Walt Disney) ആയിരുന്നു, ആ യുവാവ്.
ഇന്ന് ലോക പ്രശസ്തനായ വാള്‍ട്ട് ഡിസ്നിയുടെ ഈ ജീവിത അനുഭവം നമുക്ക് തരുന്ന ഒരു പാഠം, ജീവിത പ്രശ്നങ്ങള്‍ വരുമ്പോള്‍ നമ്മള്‍ തോറ്റു കൊടുക്കാതെ ആ പ്രതികൂല സാഹചര്യങ്ങളെ അവസരമാക്കുകയോ, അവയില്‍ അവസരങ്ങള്‍ കണ്ടെത്തുകയോ ആണ് നമ്മള്‍ ചെയ്യേണ്ടത് എന്നാണ്.
ഒരു വ്യക്തിയുടെ ജീവിതത്തിന്‍റെ അവസ്ഥ മാറ്റുവാന്‍ ദൈവം തീരുമാനിച്ചാല്‍, അവനു ചുറ്റുമുള്ള സാഹചര്യങ്ങള്‍ പ്രതികൂലമെന്ന് ലോകത്തിനു തോന്നിയാലും, ആ പ്രതികൂലങ്ങളെ പിന്നീട് അനുഗ്രഹത്തിന്‍റെ നെടുംതൂണുകളാക്കി മാറ്റി, ലോകത്തിനു മുമ്പില്‍ അത്ഭുതത്തോടെ ആ വ്യക്തിയെ നിറുത്തുവാന്‍ ദൈവത്തിനു കഴിയും. സാഹചര്യങ്ങളെയും അവസ്ഥകളെയും തന്‍റെ പദ്ധതിക്കനുസരിച്ച് വളച്ചെടുക്കുവാന്‍ ദൈവം ശക്തനാണ്.
അതായത്, പതിനൊന്നു ദിവസത്തെ യാത്രയെ നാല്പതു വര്‍ഷങ്ങളുടെ യാത്രയായി ദീര്‍ഘിപ്പിക്കുവാനും (ആവര്‍ത്തനം 1:2), ഗസെ മുതല്‍ അസ്തോദ് വരെയുള്ള 60 കിലോമീറ്റര്‍ ദൂരം നൊടിയിടയില്‍ എത്തിക്കുവാനും, ദൈവത്തിനു കഴിയും. (അപ്പൊ. പ്രവൃ 8:26,40). ഈ രണ്ടില്‍ ഏതു വേണമെന്ന് തീരുമാനമെടുക്കേണ്ടത് നമ്മളാണ്. ദൈവത്തിന് അനിഷ്ടമായതു ചെയ്താല്‍ അലഞ്ഞു വലഞ്ഞു നടക്കേണ്ട നാളുകള്‍ ജീവിതത്തില്‍ ഉണ്ടാകും. സംഖ്യ 32:13
"അങ്ങനെ യഹോവയുടെ കോപം യിസ്രായേലിൻ്റെ നേരെ ജ്വലിച്ചു; യഹോവെക്കു അനിഷ്ടമായുള്ളതു ചെയ്ത തലമുറ എല്ലാം മുടിഞ്ഞുപോകുവോളം അവൻ നാല്പതു സംവത്സരം അവരെ മരുഭൂമിയിൽ അലയുമാറാക്കി"
എന്നാല്‍ ദൈവത്തെ അനുസരിച്ച്, പരിശുദ്ധാത്മാവിന്‍റെ നടത്തിപ്പിനാല്‍ നടത്തപ്പെടുന്ന ദൈവപൈതല്‍ മൈലുകളുടെ ദൂരം നൊടിയിടയില്‍ തരണം ചെയ്യും. അപ്പൊ. പ്ര. 8:39,40
"അവർ വെള്ളത്തിൽ നിന്നു കയറിയപ്പോൾ കർത്താവിൻ്റെ ആത്മാവു ഫിലിപ്പൊസിനെ എടുത്തു കൊണ്ടുപോയി; ഷണ്ഡൻ അവനെ പിന്നെ കണ്ടില്ല; അവൻ സന്തോഷിച്ചുകൊണ്ടു തൻ്റെ വഴിക്കു പോയി.ഫിലിപ്പൊസിനെ പിന്നെ അസ്തോദിൽ കണ്ടു; .."
ചില ജീവിതങ്ങളോടുള്ള ബന്ധത്തില്‍ ദൈവാത്മാവ് നല്‍കുന്ന ഒരു ആലോചനയാണ് ഇത്, ജീവിതത്തില്‍ പല കാര്യങ്ങളും ഇഴഞ്ഞു നീങ്ങുന്ന അനുഭവം, കൈഎത്തുന്ന ദൂരത്തു നിന്നും നന്മകള്‍ തെന്നിമാറിപ്പോകുന്ന അനുഭവം, എത്ര ശ്രമിച്ചിട്ടും, സാധ്യതകള്‍ ഉണ്ടായിട്ടും ചിലതു നേടാന്‍ കഴിയാത്ത അവസ്ഥ, ഇന്നു നടക്കും നാളെ ശരിയാകും എന്ന പ്രതീക്ഷയില്‍ ആരംഭിച്ച് നാളുകളും മാസങ്ങളും കഴിഞ്ഞിട്ടും ഒരു രക്ഷയും ഇല്ലാത്ത അവസ്ഥ...........
ഇവ എല്ലാം 11 ദിവസത്തിന് പകരം യിസ്രായേല്‍ ജനം യാത്ര ചെയ്ത നാല്പതു വര്‍ഷത്തിന്‍റെ അനുഭവത്തെയാണ് കാണിക്കുന്നത്.
ദീര്‍ഘവര്‍ഷങ്ങള്‍ ഗള്‍ഫ് പ്രദേശങ്ങളില്‍ ജോലിചെയ്ത് നാട്ടില്‍ മടങ്ങി എത്തിയ, ഒരു സഹോദരനുണ്ടായ അനുഭവം, അദ്ദേഹം എന്നോട് പങ്കു വെച്ചത് ഇപ്രകാരമാണ്. അദ്ദേഹത്തിന്‍റെ ഭാര്യയും മക്കള്‍ രണ്ടുപേരും നാട്ടിലായിരുന്നു. കുടുംബത്തെ ഒരു നല്ല നിലയില്‍ എത്തിക്കുവാനും, മക്കള്‍ക്ക് രണ്ടു പേര്‍ക്കും നല്ല ഭാവി ഒരുക്കുന്നതിനുവേണ്ടിയും അദ്ധ്യാനിച്ചു സമ്പാദിച്ചതിന്‍റെ നല്ലൊരു ഭാഗവും ചിലവായി. ഇത്രയും വര്‍ഷങ്ങളുടെ സമ്പാദ്യമെന്നു പറയാന്‍ ഹൈവേയുടെ സൈഡില്‍ വാങ്ങിച്ചിട്ട ഒരു 10 സെന്‍റ് സ്ഥലം മാത്രമേ ഉള്ളൂ. നാട്ടില്‍ മടങ്ങി എത്തിയ അദ്ദേഹം തന്‍റെ സ്ഥലത്ത് ഒരു വീടു വെക്കാന്‍ ആഗ്രഹിച്ചു, എന്നാല്‍ ഒരു വീടുവെച്ചാല്‍ പിന്നീട് കൈയ്യില്‍ ഒരു രൂപപോലും ബാക്കിയുണ്ടാകില്ല, ചിലപ്പോള്‍ വീടു പൂര്‍ത്തീകരിക്കാന്‍ ലോണ്‍ എടുക്കേണ്ടിയും വരും എന്നു തിരിച്ചറിഞ്ഞ അദ്ദേഹം തന്‍റെ ഹൈവേ സൈഡിലുള്ള സ്ഥലം നല്ല വിലയ്ക്കു വിറ്റിട്ട് ഒരു ഹൗസിംഗ് കോളനിയില്‍ ഒരു വില്ല വാങ്ങുവാന്‍ ഉറപ്പിച്ചു. വില്ലയ്ക്ക് അഡ്വാന്‍സും കൊടുത്തു. നല്ല ഒരു പാര്‍ട്ടിയുമായി ഹൈവേ സൈഡിലുള്ള സ്ഥലത്തിന് കച്ചവടവും ഉറപ്പിച്ചു. സ്ഥലത്തിന് തീറെഴുതുന്നതിന്‍റെ തലേ ദിവസം ഒരു ഇടിവെട്ടുപോലെ സ്ഥലത്തിന്‍റെ പേപ്പറില്‍ കണ്ട പോരായ്മ അയാള്‍ തിരിച്ചറിഞ്ഞു. സര്‍ക്കാര്‍ രേഖകളില്‍ സ്ഥലത്തിന്‍റെ ആധാരം പൂര്‍ണ്ണമല്ല.
അങ്ങനെ ആ കച്ചവടം മാറിപ്പോയി, എന്തായാലും കയ്യിലുണ്ടായിരുന്നതെല്ലാം നുള്ളിപ്പെറുക്കി വില്ല വാങ്ങി. പിന്നീട് ദൈവം ആ കുടുംബത്തോട് കരുണകാണിച്ചു. അദ്ദേഹത്തിന്‍റെ മക്കള്‍ വിദേശത്ത് നല്ല ജോലികളിലായിരിക്കുന്നു. എങ്കിലും ഇന്നുവരെ ആ സ്ഥലം വില്‍ക്കുവാന്‍ കഴിഞ്ഞിട്ടില്ല. പ്രയോജനമില്ലാതെ കിടക്കുന്നു. വലിയ ഒരു തുക കൈഎത്തും ദൂരത്തുനിന്ന് നഷ്ടപ്പെട്ടതിന്‍റെ സങ്കടം ഇന്നും അദ്ദേഹത്തിനുണ്ട്.
അനേക കുടുംബങ്ങളില്‍ ഇതുപോലുള്ള അവസ്ഥയുണ്ട്. ശത്രുവായ സാത്താന്‍റെ ഏറ്റവും വലിയ ഒരു തന്ത്രമാണ് ഇത്. വലിയ പ്രതീക്ഷകള്‍ നല്‍കി ആശിപ്പിച്ചിട്ട് ഒന്നുമില്ലാത്ത അവസ്ഥയില്‍ കൊണ്ടു നിറുത്തും. ഒരു വ്യക്തിയെ, അല്ലെങ്കില്‍ ഒരു കുടുംബത്തെ തകര്‍ക്കാന്‍ മാനസികമായി അവരെ നിരാശയുടെ പടുകുഴിയില്‍ തള്ളിയിടാന്‍ ഇതിലും എളുപ്പമായ ഒരു മാര്‍ഗ്ഗമില്ല എന്ന് ശത്രുവിനറിയാം.
നമ്മള്‍ തളര്‍ന്നുപോകരുത് ദൈവവാഗ്ദത്തങ്ങളില്‍ വിശ്വസിച്ചിരിക്ക, എന്‍റെ വാക്കുകള്‍ ഞാന്‍ ഒരിക്കല്‍ക്കൂടി ആവര്‍ത്തിക്കുന്നു, *ഒരു വ്യക്തിയുടെ ജീവിതത്തിന്‍റെ അവസ്ഥ മാറ്റുവാന്‍ ദൈവം തീരുമാനിച്ചാല്‍, അവനു ചുറ്റുമുള്ള സാഹചര്യങ്ങള്‍ എത്ര പ്രതികൂലമെന്ന് ലോകത്തിനു തോന്നിയാലും, ആ പ്രതികൂലങ്ങളെ ക്രമേണ അനുഗ്രഹത്തിന്‍റെ നെടുംതൂണുകളാക്കി മാറ്റി, ആ വ്യക്തിയെ ലോകത്തിനു മുമ്പില്‍ അത്ഭുതത്തോടെ നിറുത്തുവാന്‍ ദൈവത്തിനു കഴിയും. സാഹചര്യങ്ങളെയും അവസ്ഥകളെയും തന്‍റെ പദ്ധതിക്കനുസരിച്ച് വളച്ചെടുക്കുവാന്‍ ദൈവം ശക്തനാണ്*.
*ആമേന്‍*
പ്രാര്‍ത്ഥനയോടെ,
ദൈവദാസന്‍ ഷൈജു ജോണ്‍
(വചനമാരി ഭോപ്പാല്‍ 7898211849)
*കുറിപ്പ്*
നിങ്ങളുടെ പ്രാര്‍ത്ഥനാ വിഷയങ്ങള്‍ അറിയിക്കുവാന്‍, വചനമാരി പ്രാര്‍ത്ഥനാ കെയര്‍ ലേക്ക് വിളിക്കാവുന്നതാണ് Ph: 0755 4297672, Mob 9589741414
