കഷ്ടങ്ങളിൽ ഏറ്റവും അടുത്ത തുണ

       "ദൈവം നമ്മുടെ സങ്കേതവും ബലവും ആകുന്നു; കഷ്ടങ്ങളിൽ അവൻ ഏറ്റവും അടുത്ത തുണയായിരിക്കുന്നു".  (സങ്കീ. 46:1)

      ജീവിതത്തിൽ കഷ്ടതകൾ വരുമ്പോൾ, കോരഹ് പുത്രന്മാരുടെ ഈ സങ്കീർത്തനവരികൾ ധ്യാനിച്ച്, പ്രത്യാശ നിറഞ്ഞ ഹൃദയത്തോടെ ദൈവത്തെ സ്തുതിച്ചുപാടി ബലപ്പെടാത്ത ദൈവമക്കൾ വിരളമായിരിക്കും

   അപ്പൊ.പൌലൊസ് തിമൊഥെയൊസിന്നു ലേഖനമെഴുതി അവസാനിപ്പിക്കുമ്പോൾ വളരെ സങ്കടത്തോടെ പറയുന്ന ഹൃദയസ്പർശിയായ ചില വാക്കുകൾ ഉണ്ട്. 2 തിമൊ 4:16

"...*ആരും എനിക്കു തുണ നിന്നില്ല; എല്ലാവരും എന്നെ കൈവിട്ടു*;.."

അടുത്ത വാക്യംകൂടെ ഇതിനോടു ചേർത്തു വായിക്കണം; (വാക്യം 17)

"*കർത്താവോ എനിക്കു തുണനിന്നു*..."

      ഇന്നത്തെ കാലഘട്ടത്തിലും എത്രയോ വാസ്തവമായ കാര്യമാണ് ഇത്; കഷ്ടങ്ങൾ വരുമ്പോൾ വീട്ടുകാരും, കൂട്ടുകാരും, നാട്ടുകാരും ആരും തുണനിൽക്കില്ല, കൂടെപ്പിറപ്പുകൾ പോലും മാറി നിന്നെന്നു വരും അപ്പോഴും നമുക്കു സങ്കേതമായി, ബലമായി, തുണയായി കർത്താവ് നമ്മുടെ കൂടെ ഉണ്ടാകും. സ്തോത്രം !

കഷ്ടങ്ങളും, പരീക്ഷകളും സങ്കടങ്ങളും ദു:ഖങ്ങളും, വേദനകളും ഒക്കെ ഇന്ന് മനുഷ്യ ജീവിതത്തിൻ്റെ ഭാഗമാണ്. എന്നാൽ ഒരിക്കൽ ഇങ്ങനെ ആയിരുന്നില്ല. ആദിയിൽ ദൈവം മനുഷ്യനുവേണ്ടി ഏദെനിൽ ഉണ്ടാക്കിയ തോട്ടത്തിൽ കഷ്ടതയും കണ്ണുനീരും വേദനയും ദു:ഖങ്ങളും ഒന്നും ഉണ്ടായിരുന്നില്ല എന്നു കാണാം. പിന്നീട് മനുഷ്യൻ പാപം ചെയ്തപ്പോൾ യഹോവയായ ദൈവം അവനെ ഏദെനിൽ നിന്ന് പുറത്താക്കുകയും, മനുഷ്യൻ്റെ ആയുഷ്കാലമൊക്കെയും കഷ്ടതയോടെ അഹോവൃത്തി കഴിക്കും എന്ന് അവനോടു കൽപ്പിക്കുകയും ചെയ്തു. (ഉൽപ്പത്തി 3:17). അന്നുമുതലാണ് കഷ്ടത മനുഷ്യ ജീവിതത്തിൻ്റെ ഭാഗമായി മാറിയത്.

     മനുഷ്യൻ്റെ കഷ്ടത മാറ്റുവാനും, അവനെ പുറത്താക്കിയ ആ ഏദെൻ പറുദീസയിലേക്ക് അവനെ തിരികെ പ്രവേശിപ്പിക്കുവാനുള്ള ദൈവത്തിൻ്റെ നിത്യപദ്ധതിയുടെ ഭാഗമായി, തൻ്റെ ഏകജാതനെ ഭൂമിയിൽ അയച്ച്, കാൽവറിയിൽ ഒരു പാപപരിഹാര യാഗമായി അർപ്പിച്ച്, പാപിയായ മനുഷ്യൻ്റെ രക്ഷയെ ദൈവം സാധ്യമാക്കിതീർത്തു. അങ്ങനെ യേശുക്രിസ്തുവിൽക്കൂടി നിത്യ രക്ഷ പ്രാപിക്കുന്ന മനുഷ്യരോടൊപ്പം ഇനി എന്നേക്കും വാസം ചെയ്യേണ്ടതിനുവേണ്ടി യഹോവയായ ദൈവം പുതിയ യെരുശലേം എന്ന വിശുദ്ധ നഗരം ഒരുക്കിയിരിക്കുന്നു. ആ നഗരത്തിൻ്റെ പ്രത്യേകതകളിൽ ഒന്ന്, അവിടെ കഷ്ടത ഇനി ഉണ്ടാകയില്ല എന്നുള്ളതാണ്. (വെളി. 21:5). ദു:ഖവും മുറവിളിയും ഉണ്ടാകയില്ല, അവിടെ നമ്മുടെ കണ്ണുനീർ എല്ലാം തുടെക്കപ്പെടും. സ്തോത്രം !

    അങ്ങനെ, പാപം ഹേതുവായി ഏദെൻ തോട്ടത്തിൽ നിന്ന് പുറത്താക്കപ്പെട്ട മനുഷ്യൻ്റെ ജീവിതത്തിൽ ഒരു ശാപം പോലെ കയറിക്കൂടിയ കഷ്ടങ്ങൾക്ക് പരിഹാരമായി, കഷ്ടതയില്ലാത്ത പുതിയ യെരുശലേം എന്ന വാഗ്ദത്ത നഗരം ഒരുക്കി ആ നഗരത്തിലേക്കുള്ള നമ്മുടെ പ്രവേശനം യേശുക്രിസ്തുവിൽക്കൂടി സൗജന്യമായി സാധ്യമാക്കിത്തീർത്ത ദൈവ കൃപയ്ക്കായി നമുക്കു സ്തോത്രം ചെയ്യാം !.

ഉൽപ്പത്തി പുസ്തകത്തിൽ നിന്ന് ആരംഭിച്ച്, വെളിപ്പാട് പുസ്തകത്തിൽ അവസാനിക്കുന്ന, മനുഷ്യജീവിതത്തിൽ ഉണ്ടാകുന്ന കഷ്ടങ്ങളിൽ ദൈവത്തിൻ്റെ ഇടപെടലുകളും നീക്കുപോക്കുകളും എന്തെല്ലാമാണ് എന്ന് വിശുദ്ധ ബൈബിളിൽ രേഖപ്പെടുത്തിയിട്ടുണ്ട്, അവയിൽ ചിലത് ഞാന്‍ ഓര്‍മ്മിപ്പിക്കാം;

   സത്യദൈവത്തെ അറിയാത്തവരും അവിശ്വാസികളുമായ മനുഷ്യർ, തങ്ങളുടെ ജീവിതത്തിൽ കഷ്ടങ്ങളും ശോധനകളും വരുമ്പോൾ പരിഹാരമാർഗ്ഗങ്ങൾ തേടി അലയുവാൻ ആരംഭിക്കുന്നു. ചിലർ മന്ത്രവാദികളുടെയും, ആഭിചാരകരുടെയും, കൂടോത്രക്കാരുടെയും അടുക്കൽ പോകുന്നു. ചിലർ നേർച്ച കാഴ്ചകളും പുണ്ണ്യപ്രവർത്തികളും ചെയ്യുവാൻ ആരംഭിക്കുന്നു. ചിലർ ദൈവത്തെ പഴിക്കുവാനും പ്രാകുവാനും തുടങ്ങുന്നു. ചിലര്‍ ജീവിതം അവസാനിപ്പിച്ച് ആത്മഹത്യ ചെയ്യുന്നു.....

    എന്നാൽ ഇവ ഒന്നും ജീവിതത്തിൽ വരുന്ന കഷ്ടങ്ങൾക്കുള്ള പരിഹാരമല്ല, മാത്രമല്ല മനുഷ്യ ജീവിതത്തിൽ കഷ്ടങ്ങൾ വരുന്നത് ആരാലും തടയുവാൻ കഴിയുന്നതുമല്ല. ദൈവം മനുഷ്യനുവേണ്ടി ഒരുക്കിക്കൊണ്ടിരിക്കുന്ന പുതിയ യെരുശലേം നഗരത്തിൽ പ്രവേശിക്കുന്നതുവരെയും മനുഷ്യർ കഷ്ടങ്ങളിൽക്കൂടി കടന്നുപോയെ മതിയാകുകയുള്ളൂ. ജഡത്തിൽ ജനിച്ച ഒരു മനുഷ്യനും (യേശുവിനുപോലും) ഇതിൽ നിന്ന് ഒഴിഞ്ഞിരിക്കാനാകില്ല എന്ന് തിരുവചന വാക്യങ്ങളിൽ നമുക്ക് വായിക്കാം;