പിമ്പന്മാർ മുമ്പന്മാരും മുമ്പന്മാർ പിമ്പന്മാരും ആകും

"പിമ്പന്മാർ മുമ്പന്മാരും മുമ്പന്മാർ പിമ്പന്മാരും ആകും" മത്തായി 20:16 

     നമ്മുടെ കർത്താവ് അരുളിച്ചെയ്ത ഈ തിരുവചനം ഇന്നു വായിച്ചപ്പോൾ, പഴയ നിയമത്തിൽ രേഖപ്പെടുത്തിയിരിക്കുന്ന ഒരു സംഭവമാണ് എനിക്ക് ഓർമ്മ വന്നത്.

ഒരിക്കൽ മോശെയും യിസ്രായേൽ ജനവും സമാഗമനകൂടാരത്തിൻ്റെ വാതിൽക്കൽ കരഞ്ഞുകൊണ്ടിരിക്കുകയായിരുന്നു (സംഖ്യപുസ്തകം 25:6), ദൈവത്തിൻ്റെ കോപം യിസ്രായേലിൻ്റെ നേരെ ജ്വലിക്കയും ഒരു ബാധ അവർക്കുണ്ടാകുകയും ആയിരങ്ങൾ ബാധയാൽ മരിച്ചുവീഴുകയും ചെയ്തതുകൊണ്ടാണ് മോശെയോടൊപ്പം ആ ജനം സമാഗമന കൂടാരത്തിൻ്റെ മുമ്പിൽ കരഞ്ഞുകൊണ്ട് എത്തിയത്. യിസ്രായേൽജനം ജാതീയ (മോവാബ്യ) സ്ത്രീകളുമായി പരസംഗം തുടങ്ങിയതുകൊണ്ടും, അവരുടെ ദേവന്മാരുടെ ബലികൾക്ക് പോകയും അവയെ നമസ്കരിക്കയും ചെയ്തതുകൊണ്ടുമാണ് യഹോവയുടെ ഉഗ്രകോപം അവരുടെ നേരെ ജ്വലിക്കുവാൻ കാരണമായത് എന്ന് ഒന്നാം വാക്യത്തിൽ രേഖപ്പെടുത്തിയിട്ടുണ്ട്.

ഇത്രയൊക്കെ ചെയ്തതു പോരാഞ്ഞിട്ട് സിമ്രി എന്നു പേരുള്ള ഒരു യിസ്രായേല്യൻ, മോശെയും കൂട്ടരും സമാഗമനകൂടാരത്തിൻ്റെ വാതില്‍ക്കൽ കരഞ്ഞുകൊണ്ടിരിക്കുമ്പോൾ തന്നെ അവരുടെ മദ്ധ്യത്തിലേക്കു കോസ്ബി എന്നു പേരുള്ള ഒരു മിദ്യാന്യ സ്ത്രീയെ കൊണ്ടുവന്നു. ഈ ഹീനകൃത്യം കണ്ട് സര്‍വ്വസഭയും മിണ്ടാതെ നിന്നപ്പോൾ, ഒരു ചെറുപ്പക്കാരൻ‍ അവരുടെ ഇടയിൽനിന്ന് എഴുന്നേറ്റ് കയ്യിൽ ഒരു കുന്തം എടുത്തുകൊണ്ടുപോയി ആ മിദ്യാന്യ സ്ത്രീയെയും പുരുഷനെയും കുത്തിക്കൊന്നു. അഹരോൻ പുരോഹിതൻ്റെ മകനായ എലെയാസാരിൻ്റെ മകൻ ഫീനെഹാസ് ആയിരുന്നു ആ ചെറുപ്പക്കാരൻ.

ഈ വചനഭാഗം വായിക്കുന്ന ഓരോരുത്തർക്കും ന്യായമായ ഒരു ചോദ്യം മനസ്സിൽ ഉദിക്കാൻ സാധ്യതയുണ്ട്; *സമാഗമന കൂടാരത്തിനകത്ത് കണ്ണിനു മുമ്പിൽ ഇതുപോലെ ഒരു പാപം നടക്കുന്നതു കണ്ടിട്ട് മോശെ എന്തുകൊണ്ടാണ് മിണ്ടാതിരുന്നത്?*

*അവരെ ശിക്ഷിക്കാതിരിക്കാൻ മോശെക്ക് കഴിയാതെ പോയത് എന്തുകൊണ്ടാണ്?*

*ദൈവാലയത്തെക്കുറിച്ചുള്ള തീക്ഷ്ണത (എരിവ്) മറ്റാരേക്കാളും മോശെക്കല്ലേ ഉണ്ടാകേണ്ടിയിരുന്നത്?*

ഇതുപോലുള്ള ചോദ്യങ്ങൾക്ക് കൃത്യമായ ഒരു മറുപടി പറയുവാൻ മോശെക്ക് ഒരു പക്ഷേ ബുദ്ധിമുട്ടുണ്ടാകാം, ചിലപ്പോൾ ഉത്തരം പറയാതെ ഒഴിഞ്ഞുമാറിയെന്നും വരാം. എന്നാൽ ദൈവവചനത്തിൽ നിന്നുതന്നെ ഇതിനുള്ള ഉത്തരം നമുക്കു മനസ്സിലാക്കാവുന്നതേ ഉള്ളൂ.

സംഖ്യ. 12:1 മുതൽ വായിക്കുന്നത്, മോശെ ഒരു കൂശ്യസ്ത്രീയെ വിവാഹം കഴിച്ചു എന്നാണ്, ആ കാര്യം യിസ്രായേൽ ജനങ്ങൾക്കിടയിൽ ഒരു സംസാര വിഷയമായിരുന്നു എന്നും മനസ്സിലാക്കാം. ആ കാര്യത്തിലുണ്ടായിരുന്ന എതിർപ്പ് അന്ന് പലരും തുറന്നുപറയാതെ മനസ്സിൽ കൊണ്ടു നടന്നപ്പോൾ, മിര്യാമും അഹരോനും പക്ഷേ അതു തുറന്നു പറഞ്ഞു.

തങ്ങളുടെ അഭിപ്രായം മിര്യാമും അഹരോനും തുറന്നു പറഞ്ഞതിൽ തെറ്റൊന്നും കാണാനില്ല, എന്നാൽ അവർ അതിന്‍റെ കൂടെ പറഞ്ഞ കാര്യങ്ങളാണ് ദൈവത്തെ കോപിപ്പിച്ചത് എന്ന് മനസ്സിലാക്കാം. ("..മിര്യാമും അഹരോനും അവന്നു (മോശെക്ക്) സംസാരിച്ചു; യഹോവ മോശെ മുഖാന്തിരം മാത്രമേ അരുളിച്ചെയ്തിട്ടുള്ളുവോ? ഞങ്ങൾ മുഖാന്തരവും അരുളിച്ചെയ്തിട്ടില്ലയോ എന്നു പറഞ്ഞു; യഹോവ അതു കേട്ടു" സംഖ്യ 12:2)

പറയേണ്ടതു മാത്രം പറയാതെ, പറയാന്‍ പാടില്ലാത്തവ പറഞ്ഞതുകൊണ്ടാണ് മിര്യാമിന് ദൈവശിക്ഷ ഏൽക്കേണ്ടി വന്നത് (കുഷ്ഠരോഗിണിയായത്).