നശിക്കാതിരിപ്പാൻ പുത്രനെ ചുംബിപ്പീൻ

     സങ്കീർ. 2:12 "..നിങ്ങൾ വഴിയിൽവച്ചു നശിക്കാതിരിപ്പാൻ പുത്രനെ ചുംബിപ്പീൻ.."
ഈ വിശുദ്ധ തിരുവെഴുത്തിനെ ആസ്പദമാക്കി, ഒരു ദൈവപൈതലിന്റെ വിശ്വാസജീവിതയാത്രയിൽ, വഴിയിൽവെച്ച് ഉണ്ടാകാൻ സാധ്യതയുള്ള ഏഴ് അനർത്ഥങ്ങളെക്കുറിച്ച് കഴിഞ്ഞ ദിവസങ്ങളായി നമ്മൾ ധ്യാനിച്ചുകൊണ്ടിരിക്കുകയാണല്ലോ. ഈ ധ്യാനസന്ദേശത്തിന്റെ അവസാനഭാഗം ഇന്ന് നമുക്കു ചിന്തിക്കാം;

*5) വഴിയിൽവെച്ചു അമാലേക്ക് ചെയ്തത്* (ആവർ. 25:17)
    ദൈവമക്കളുടെ വിശ്വാസ ജീവിതയാത്രയിൽ, അവരെ വഴിയിൽവെച്ച് നശിപ്പിക്കാൻ തക്കംനോക്കിയിരിക്കുന്ന ഒരു കൂട്ടരാണ് അമാലേക്യർ. യിസ്രായേൽ ജനം മിസ്രയീമിൽനിന്നു പുറപ്പെട്ടു വരുമ്പോൾ വഴിയിൽവെച്ച് അമാലേക്ക് അവരെ ആക്രമിച്ചു. 'അവരോടു ചെയ്തതിനെ ഞാൻ കുറിച്ചുവെച്ചിരിക്കുന്നു' എന്നാണ് സൈന്യങ്ങളുടെ യഹോവ അരുളിച്ചെയ്യ്തിരിക്കുന്നത് (1 ശമുവേൽ 15:2).
      സർവ്വശക്തനായ ദൈവംതമ്പുരാൻ കുറിച്ചുവെക്കുവാൻ തക്ക എന്തുകാര്യമാണ് ഇവർ വഴിയിൽവെച്ച് ദൈവജനത്തോട് ചെയ്തത് എന്ന് പുറപ്പാട് 17:8 മുതൽ വായിക്കുമ്പോൾ മനസ്സിലാകും.
*യിസ്രായേൽ ജനത്തെ വഴിയിൽവെച്ച് ആക്രമിച്ച ആദ്യത്തെ ജാതീയരായിരുന്നു അമാലേക്യർ*.
*ഒരു പ്രകോപനവും കൂടാതെയാണ് ഇവർ ദൈവജനത്തോട് യുദ്ധത്തിനു വന്നത്*.
*പുറപ്പാട് 24:20. അമാലേക്യർ ജാതികളിൽ മുമ്പൻ എന്നു എഴുതിയിരിക്കുന്നു. അതായത് ഏറ്റവും കേമന്മാരെയാണ് വഴിയിൽവെച്ച്  ദൈവജനത്തിന് നേരിടേണ്ടി വന്നത് എന്നു സാരം*.
       ഇതുപോലെ, നമ്മുടെ വിശ്വാസജീവിതയാത്രയിലും വഴിയിൽവെച്ച് അമാലേക്യർക്ക് സമമായി അപ്രതീക്ഷിതമായ നിരവധി തടസ്സങ്ങളും പോരാട്ടങ്ങളും നേരിടേണ്ടതായി വന്നേക്കാം. ഇന്ന് നമുക്ക് എതിരു നിൽക്കുന്നവർ നമ്മെക്കാൾ കേമന്മാരും മിടുക്കന്മാരും ആയേക്കാം. എങ്കിലും നാം ഭയപ്പെടേണ്ടതില്ല. കാരണം, 'അമാലേക്കിന്റെ ഓർമ്മ ആകാശത്തിന്റെ കീഴിൽനിന്നു അശേഷം മായിച്ചുകളയും' (പുറ. 17:14) എന്ന വാഗ്ദത്തം ചെയ്ത കർത്താവ് നമ്മോടു കൂടെ ഉണ്ട്. അതുകൊണ്ട് ഇന്ന് തടസ്സമായി നിൽക്കുന്നവരെയും (നിൽക്കുന്നവയെയും) ദൈവം നീക്കിത്തരും. അമാലേക്ക് അവരുടെ സമന്മാർക്ക് ഒരു ഭീഷണി ആയെന്നുവരാം, അവരേക്കൾ ശ്രേഷ്ഠന്മാരെ തോൽപ്പിച്ച ചരിത്രം ഉള്ളവരും ആയിരിക്കാം, ബുദ്ധിയിലും സാമർത്ഥ്യത്തിലും മറ്റുള്ളവരേക്കാൾ ഒരുപടി മുമ്പിലുള്ളവരുമായിരിക്കാം. എന്നാൽ ഇവിടെ അവർ തോൽക്കാൻ കാരണം, അവരുടെ പോരാട്ടം ദൈവജനത്തോട് ആയിപ്പോയതുകൊണ്ടാണ്.
*ദൈവമക്കൾക്ക് എതിരു നിന്നാൽ ഒരു അമാലേക്കിനും ജയിക്ക സാധ്യമല്ല, കാരണം അവരെ മുടിച്ചുകളവാൻ പോന്നവൻ നമ്മോടു കൂടെ ഉണ്ട്*. സ്തോത്രം !

*6) വഴിയിൽവെച്ചു ബലം ക്ഷയിക്കും* (സങ്കീർ. 102:23)
      നമ്മുടെ സീയോൻ യാത്രാമധ്യത്തിൽ വഴിയിൽവെച്ച് സംഭവിക്കാവുന്ന മറ്റൊരു അപകടമാണ്, ബലക്ഷയം. ശരീരത്തിന്റെ ബലഹീനത മാത്രമല്ല, ആത്മീയ ബലക്ഷയമാണ് ഇന്ന് അനേകരെ ബാധിച്ചിരിക്കുന്നത്. തീഷ്ണതയോടെ ദൈവവേല ചെയ്തിരുന്നവർ, ശുഷ്കാന്തിയോടെ പ്രവർത്തിച്ചിരുന്നവർ എന്നൊക്കെയുള്ള തലക്കെട്ടുകളിൽ മാത്രം നമ്മൾ ഒതുങ്ങിപ്പോയോ എന്ന് ആത്മാർത്ഥമായ ഒരു സ്വയവിമർശനത്തിന് തയ്യാറാകണം. പ്രായം നമ്മുടെ ശരീരത്തെ ബലഹീനമാക്കി എന്നു വരാം, നമ്മുടെ കാഴ്ചയുടെ ശക്തി കുറച്ചെന്നു വരാം, നമ്മുടെ ഓർമ്മകളെ ബാധിച്ചെന്നു വരാം, അപ്പോഴും ഒരു ആത്മീയൻ പറയേണ്ടത്, (ജരാനരകൾ ബാധിച്ചപ്പോഴും) അപ്പോ.പൌലൊസ് പറഞ്ഞ വാക്കുകളായിരിക്കണം;
"എന്നെ ശക്തനാക്കുന്നവൻ മുഖാന്തരം ഞാൻ സകലത്തിന്നും മതിയാകുന്നു' (ഫിലി. 4:13)

*7) വഴിയിൽവെച്ച് പരീക്ഷ* (മർക്കൊസ് 8:27)
     വഴിയിൽവെച്ച് യേശു തന്റെ ശിഷ്യന്മാരോട് ചോദിക്കുന്ന പരമപ്രധാനമായ ഒരു ചോദ്യമാണ് ഈ വചനഭാഗത്ത് നമ്മൾ കാണുന്നത്. വാക്യം 29 'നിങ്ങൾ എന്നെ ആർ എന്നു പറയുന്നു ?'.
     ഞാൻ പലപ്പോഴും ചിന്തിച്ചിട്ടുണ്ട്; കർത്താവ് എന്തുകൊണ്ടാണ് ഈ ചോദ്യം അവിടുത്തെ ശിഷ്യന്മാരോട്, രാത്രിയിൽ അവർ പാർക്കുന്നിടത്തുവെച്ച് രഹസ്യത്തിൽ ചോദിക്കാതെ, പട്ടാപ്പകൽ പൊതുവഴിയിൽവെച്ച് ചോദിച്ചത് ? തീർച്ചയായിട്ടും ഇതിനൊരു കാരണമുണ്ട്. അത് മറ്റൊന്നുമല്ല; *ഈ ചോദ്യത്തിനുള്ള ഉത്തരം ഇന്ന് നമ്മൾ രഹസ്യത്തിൽ പറയേണ്ടതല്ല, ഭയത്തോടും ശങ്കയോടും പറയേണ്ടതുമല്ല, ഒളിഞ്ഞും മറഞ്ഞും പറയേണ്ടതല്ല, അടക്കത്തിലും ഒതുക്കത്തിലും പറയേണ്ടതുമല്ല*
ലജ്ജകൂടാതെ, സങ്കോചമില്ലാതെ, ഉറപ്പോടെ, ധൈര്യത്തോടെ ഈ ലോകത്തോട് നമ്മൾ ഉച്ചത്തിൽ പറയണം;
'നീ ക്രിസ്തു ആകുന്നു' ദൈവപുത്രനായ യേശു ക്രിസ്തു തന്നെ, പാപികളായ മനുഷ്യരെ രക്ഷിക്കുവാൻ സ്വർല്ലോകം വെടിഞ്ഞ് ഭൂമിയിൽ ഇറങ്ങിവന്ന ദൈവപുത്രൻ നീ തന്നെ. ദൈവമായിരിക്കേ ദാസരൂപം എടുത്ത് മനുഷ്യസാദൃശ്യനായി ക്രൂശിൽ മരിക്കുവാൻ താഴ്മയോടെ ഇറങ്ങി വന്ന നമ്മുടെ രക്ഷകനും, വീണ്ടെടുപ്പുകാരനും അവൻ തന്നേ. ഹാലേലൂയ്യാ... സ്തോത്രം !

ആകയാൽ പ്രിയരേ, ഈ സീയോൻ യാത്രയിൽ വഴിയിൽവെച്ച് സംഭവിക്കാവുന്ന സകല അനർത്ഥങ്ങളിൽ നിന്നും സങ്കടങ്ങളിൽ നിന്നും, ശത്രുക്കളിൽ നിന്നും ദോഷങ്ങളിൽ നിന്നും നമ്മൾ നശിച്ചുപോകാതിരിക്കുവാൻ ദൈവപുത്രനായ യേശു ക്രിസ്തുവിനെ ചുംബിക്കാം. ഒരിക്കൽക്കൂടി ആ വചനം നമ്മുടെ ഹൃദയത്തിൽ ഏറ്റെടുക്കാം;
".. *നിങ്ങൾ വഴിയിൽവച്ചു നശിക്കാതിരിപ്പാൻ പുത്രനെ ചുംബിപ്പീൻ* .."  സങ്കീർ. 2:12

*പ്രാർത്ഥനയോടെ*
ക്രിസ്തുവിൽ സ്നേഹപൂർവ്വം..
ഷൈജു ജോൺ (9424400654)
വചനമാരി (ഭോപ്പാൽ)

*കുറിപ്പ്*:
നിങ്ങളുടെ വിശ്വാസജീവിതത്തിൽ പ്രത്യാശനൽകുന്ന അനുദിന ധ്യാനചിന്തകൾ വചനമാരിയിൽ നിന്ന്  കൃത്യമായി / കൃമമായി ലഭിക്കുവാൻ ഞങ്ങളുടെ വാട്സ് ഗ്രൂപ്പിൽ അംഗമാകുക. ഈ വാഗ്ദത്ത സന്ദേശം അനുഗ്രഹമായെങ്കിൽ മറ്റുള്ളവർക്കും അയച്ചുകൊടുക്കുക. കൂടാതെ വചനമാരി മാസിക ലഭിക്കുവാൻ താൽപ്പര്യമുള്ളവർ നിങ്ങളുടെ വിലാസം അയച്ചുതരിക.
പ്രാർത്ഥനാ വിഷയങ്ങൾ അറിയിക്കുവാൻ, വചനമാരി പ്രാർത്ഥനാ കെയർ ലേക്ക് വിളിക്കാവുന്നതാണ് Ph: 0755 4297672, Mob: 7898211849, 9589741414, 700047704   Our Address :
VACHANAMARI
82, SARVADARAM- C
KOLAR ROAD. P. O
BHOPAL- 462042, M. P