ഉല്പത്തി 32:10
"അടിയനോടു കാണിച്ചിരിക്കുന്ന സകല ദയയ്ക്കും സകല വിശ്വസ്തതയ്ക്കും ഞാൻ അപാത്രമത്രേ;.."
യാക്കോബ് തൻ്റെ ദൈവത്തോട് പ്രാർത്ഥിക്കുന്ന ഒരു പ്രാർത്ഥനയാണ് ഈ വരികൾ. താൻ ഒന്നുമില്ല, ഏതുമില്ല സകലവും ദൈവത്തിൻ്റെ ദയയാലും കരുണയാലും സംഭവിച്ചതാണ് / ഉണ്ടായതാണ് എന്ന് സമ്മതിക്കുന്നവരെ, അത് അംഗീകരിക്കുന്നവരെ ദൈവം മാനിക്കും എന്ന് യാക്കോബിൻ്റെ ചരിത്രം നമ്മെ പഠിപ്പിക്കുന്നു. ഇപ്രകാരം ദൈവത്തോട് പ്രാർത്ഥിച്ച യാക്കോബിനെയാണ് യഹോവയായ ദൈവം യിസ്രായേലാക്കി മാറ്റിയത് (ഉല്പത്തി 32:28)
ഇതേ മനോഭാവവും താഴ്മയും രൂത്തിൻ്റെ ജീവിതത്തിലും നമുക്ക് കാണുവാൻ കഴിയും (രൂത്ത് 2:10,13) "എന്നാറെ അവൾ സാഷ്ടാംഗം വീണു അവനോടു: ഞാൻ അന്യദേശക്കാരത്തി ആയിരിക്കെ നീ എന്നെ വിചാരിപ്പാൻ തക്കവണ്ണം നിനക്കു എന്നോടു ദയതോന്നിയതു എങ്ങനെ എന്നു പറഞ്ഞു. …യജമാനനേ, ഞാൻ നിൻ്റെ ദാസിമാരിൽ ഒരുത്തിയെപ്പോലെയല്ല എന്നുവരികിലും നീ എന്നെ ആശ്വസിപ്പിക്കയും അടിയനോടു ദയയായി സംസാരിക്കയും ചെയ്‍വാൻ തക്കവണ്ണം എന്നോടു നിനക്കു കൃപതോന്നിയല്ലോ എന്നു പറഞ്ഞു" ബോവസിൻ്റെ ദാസിയാകുവാൻ പോലും യോഗ്യതയില്ലാത്ത ഒരു അന്യദേശക്കാരത്തിയാണ് താൻ എന്ന് സമ്മതിച്ച രൂത്തിനെ ദൈവം ബോവസിൻ്റെ ഭാര്യയാക്കി, ബോവസിൻ്റെ ദാസിമാരുടെ യജമാനത്തി ആക്കി.
ഇയ്യോബ് തൻ്റെ ദൈവത്തോട്, താൻ ഏതുമില്ല എന്ന് സമ്മതിച്ചുകൊണ്ട് വാപൊത്തി നിന്ന് ദൈവത്തിനു സകലവും കഴിയും എന്ന് പറഞ്ഞപ്പോഴാണ് യഹോവയായ ദൈവം ഇയ്യോബിൻ്റെ പിൻകാലത്തെ അവൻ്റെ മുൻകാലത്തെക്കാൾ അധികം അനുഗ്രഹിച്ചത്. (ഇയ്യോബ് 40:4 "ഞാൻ നിസ്സാരനല്ലോ, ഞാൻ നിന്നോടു എന്തുത്തരം പറയേണ്ടു? ഞാൻ കൈകൊണ്ടു വായി പൊത്തിക്കൊള്ളുന്നു") ഇയ്യോബ് 42:2,12)
ഞാൻ അയോഗ്യയാണ്, യജമാനൻ്റെ ദാസന്മാരുടെ കാലുകളെ കഴുകുന്ന ദാസി മാത്രമാണ്, എന്ന് പറഞ്ഞ അബീഗയിൽ ദാവീദിൻ്റെ ഭാര്യയായിത്തീർന്നു എന്നു തിരുവചനത്തിൽ വായിക്കുന്നു . (1 ശാമുവേൽ 25:41 "അവൾ എഴുന്നേറ്റു നിലംവരെ തല കുനിച്ചു: ഇതാ, അടിയൻ യജമാനൻ്റെ ദാസന്മാരുടെ കാലുകളെ കഴുകുന്ന ദാസി എന്നു പറഞ്ഞു.")
എൻ്റെ പിന്നാലെ എന്നിലും ബലമേറിയവൻ വരുന്നുണ്ട് അവൻ്റെ ചെരിപ്പിൻ്റെവാർ കുനിഞ്ഞഴിപ്പാൻ ഞാൻ യോഗ്യനല്ല (മർക്കോസ് 1:7) എന്ന് പറഞ്ഞ യോഹന്നാൻ സ്നാപകനെക്കുറിച്ചു യേശുകർത്താവ് പറയുന്നത് ഇപ്രകാരമാണ്; "സ്ത്രീകളിൽ നിന്നു ജനിച്ചവരിൽ യോഹന്നാനെക്കാൾ വലിയവൻ ആരുമില്ല; ദൈവരാജ്യത്തിൽ ഏറ്റവും ചെറിയവനോ അവനിലും വലിയവൻ” എന്നു ഞാൻ നിങ്ങളോടു പറയുന്നു" ലൂക്കോസ് 7:28.
യേശുവിൻ്റെ കാൽക്കൽ വീണു: കർത്താവേ, ഞാൻ പാപിയായ മനുഷ്യൻ ആകകൊണ്ടു എന്നെ വിട്ടുപോകേണമേ എന്നു പറഞ്ഞ ശിമോൻ പത്രൊസ് അപ്പൊസ്തലന്മാരിൽ ഒന്നാമനായതിൽ അത്ഭുതപ്പെടാനില്ല (ലൂക്കോസ് 5:8, മത്തായി 10:2 "ഒന്നാമൻ പത്രൊസ് എന്നു പേരുള്ള ശിമോൻ..")
തൻ്റെ ബാല്യക്കാരന് സൗഖ്യം തേടി യേശുവിൻ്റെ അടുക്കൽ വന്ന ശതാധിപൻ കർത്താവിനോടു പറയുന്നത് "കർത്താവേ, നീ എൻ്റെ പുരെക്കകത്തു വരുവാൻ ഞാൻ യോഗ്യനല്ല; ഒരു വാക്കുമാത്രം കല്പിച്ചാൽ എൻ്റെ ബാല്യക്കാരന്നു സൗഖ്യെം വരും" (മത്തായി 8:8) എന്നാണ്. താഴ്മയുടെ ഈ വാക്കുകൾ കേട്ട കർത്താവു അവൻ്റെ വിശ്വാസത്തിങ്കൽ അതിശയിച്ചു, അവൻ്റെ ബാല്യക്കാരന് സൗഖ്യെം നൽകി. ഈ ശതാധിപൻ്റെ വിശ്വാസവും എളിമയുടെ വാക്കുകളും തലമുറകൾ ഓർത്തിരിക്കും.
പ്രിയരേ, ഇനിയും ഇതുപോലെ നിരവധി ഉദാഹരണങ്ങൾ വേദപുസ്തകത്തിൽ നമുക്ക്കാണുവാൻ കഴിയും, തങ്ങൾ ഏതുമില്ല എന്ന് സമ്മതിച്ചു ദൈവത്തോട് അടുത്തുവന്നവരെ ദൈവം മാനിച്ചു. ഇന്ന് നമുക്കും കർത്താവിനോടു പറയാം / സമ്മതിക്കാം / അംഗീകരിക്കാം, കർത്താവേ, ഞാൻ ഏതുമല്ല, എൻ്റെ കഴിവും യോഗ്യതയായും ഒന്നുമില്ല നിൻ്റെ ദയയും കരുണയുമാണ് എന്നെ നിർത്തുമാറാക്കിയത്. എന്നെ ഞാൻ സമ്പൂർണ്ണമായി സമർപ്പിക്കുന്നു. എന്നോടു ദയ തോന്നേണമേ..
ഈ സമർപ്പണ പ്രാർത്ഥന നിങ്ങളുടെ ജീവിതത്തിൽ വലിയ മാറ്റങ്ങൾക്കു / അനുഗ്രഹങ്ങൾക്ക് കാരണമാകട്ടെ എന്ന പ്രത്യാശയോടെ,
ക്രിസ്തുവിൽ സ്നേഹപൂർവ്വം..
ഷൈജു ബ്രദർ
(വചനമാരി,ഭോപ്പാൽ)
കുറിപ്പ്:
നിങ്ങളുടെ വിശ്വാസജീവിതത്തിൽ പ്രത്യാശനൽകുന്ന അനുദിന ധ്യാനചിന്തകൾ വചനമാരിയിൽ നിന്ന് കൃത്യമായി / കൃമമായി ലഭിക്കുവാൻ ഞങ്ങളുടെ വാട്സ് ഗ്രൂപ്പിൽ അംഗമാകുക. ഈ വാഗ്ദത്ത സന്ദേശം അനുഗ്രഹമായെങ്കിൽ മറ്റുള്ളവർക്കും അയച്ചുകൊടുക്കുക. നിങ്ങളുടെ പ്രാർത്ഥനാ വിഷയങ്ങൾ അറിയിക്കുവാൻ, വചനമാരി പ്രാർത്ഥനാ കെയർ ലേക്ക് വിളിക്കാവുന്നതാണ് Phവ: 0755 4297672, Mob: 7898211849, 9589741414, 7000477047
