2 യോഹന്നാൻ 1:9 “ക്രിസ്തുവിൻ്റെ ഉപദേശത്തിൽ നിലനിൽക്കാതെ അതിർ കടന്നുപോകുന്ന ഒരുത്തന്നും ദൈവം ഇല്ല; ഉപദേശത്തിൽ നിലനില്ക്കുന്നവന്നോ പിതാവും പുത്രനും ഉണ്ടു”
ഇവിടെ രേഖപ്പെടുത്തിയിരിക്കുന്ന അതിർ എന്ന വാക്കുകൊണ്ട് ഉദ്ദേശിക്കുന്നത് ദൈവവചനത്തിൽ പറഞ്ഞിരിക്കുന്ന സത്യ ഉപദേശങ്ങളാണ്. ആ ഉപദേശങ്ങൾ അറിഞ്ഞ് അതിരുകൾക്കുള്ളിൽ നിലനിൽക്കുന്നവരോടുകൂടെ കർത്താവ് ഉണ്ടായിരിക്കും. അതിരുകൾ ലംഘിക്കപ്പെടുമ്പോൾ സാത്താൻ ആക്രമിക്കുകയും നാശങ്ങൾ ഉണ്ടാക്കുകയും ചെയ്യും. ഇതിനെ സംബന്ധിച്ച് ജ്ഞാനിയായ ശലോമോൻ രേഖപ്പെടുത്തിയിരിക്കുന്നത് ഇപ്രകാരമാണ് “…മതിൽ (അതിർ) പൊളിക്കുന്നവനെ പാമ്പു കടിക്കും” (സഭാപ്രസംഗി 10:8).
ദൈവവചനത്തിൻ്റെ ഉപദേശങ്ങൾ കഠിനമാണ്, ഇന്നത്തെ ലോക സാഹചര്യത്തിൽ വേദവചനങ്ങൾ അനുസരിച്ച് ജീവിക്കുന്നത് പ്രായോഗികമല്ല. അതുകൊണ്ട് ഉപദേശങ്ങളിൽ ചില പരിഷ്കാരങ്ങൾ വരുത്തിയാലും സാരമില്ല.. എന്നൊക്കെയുള്ള ധാരണയിൽ ഇന്ന് അനേകർ ഉപദേശത്തിൻ്റെ മതിലുകൾ പൊളിക്കുവാൻ ശ്രമിക്കുന്നുണ്ട്. വചനത്തോട് ദൈവം വിട്ടുവീഴ്ച്ച ചെയ്യുമോ?. ദൈവം പറഞ്ഞ കാര്യത്തെക്കുറിച്ച് നല്ല നിശ്ചയമുണ്ടായരുന്നിട്ടും സ്ത്രീ പാമ്പിൻ്റെ കൌശലത്തിൽ വീഴുകയും ദൈവം കൽപ്പിച്ച അതിർ ലംഘിക്കയും ചെയ്തതുകൊണ്ട് ഏദെൻ തോട്ടത്തിൽ നിന്ന് പുറത്താക്കപ്പെട്ടില്ലേ?.
എന്നാൽ യോസേഫിന് തൻ്റെ അതിരിനെക്കുറിച്ച് നല്ല ബോധ്യമുണ്ടായിരുന്നു അതുകൊണ്ടാണ് അവൻ ഇപ്രകാരം പറഞ്ഞത് “..നീ അവൻ്റെ ഭാര്യയാകയാൽ നിന്നെയല്ലാതെ മറ്റു യാതൊന്നും അവൻ എനിക്കു വിരോധിച്ചിട്ടുമില്ല;..” (ഉല്പത്തി 39:9). എല്ലാ സ്വാതന്ത്രവും തനിക്കുണ്ടായിരുന്നപ്പോഴും തൻ്റെ അതിരിനെക്കുറിച്ച് അവൻ ബോധവാനായിരുന്നതുകൊണ്ട് സാത്താന് അവനെ നശിപ്പിക്കാൻ കഴിഞ്ഞില്ല. അതുകൊണ്ടാണ് *‘യഹോവ യോസേഫിനോടുകൂടെ ഉണ്ടായിരുന്നു’* എന്ന് വേദപുസ്തകത്തിൽ പല ആവർത്തി രേഖപ്പെടുത്തിയിരിക്കുന്നത്.
അതിരുകൾ അറിഞ്ഞ് ജീവിക്കുന്നവരോടുകൂടെ ഇന്നും കർത്താവുണ്ട്. പോകരുത്, കാണരുത്, നോക്കരുത്, തൊടരുത്, രുചിക്കരുത്, ചെയ്യരുത്, ഇടപെടരുത്… വേദപുസ്തകത്തിൽ അരുത് എന്നു രേഖപ്പെടുത്തിയിരിക്കുന്ന അതിരുകൾ മറികടന്ന് പ്രലോഭനത്തിന് ഹേതുവായിരിക്കുന്നതെന്തും നമുക്ക് വിലക്കപ്പെട്ട വൃക്ഷം പോലെയോ പോത്തിഫറിൻ്റെ ഭാര്യയെപ്പോലെയോ ആണ് എന്നു മനസ്സിലാക്കണം. അതിരുകൾ അറിയാമായിരുന്നിട്ടും ശിംശോൻ അതു ലംഘിച്ചു, ശൌൽ അതു ലംഘിച്ചു, ശലോമോൻ അതു ലംഘിച്ചു,…. സാത്താനാൽ വഞ്ചിക്കപ്പെട്ടു.
ആത്മീയ ജീവിതത്തിൽ, കുടുംബ ജീവിതത്തിൽ, ജോലി ചെയ്യുന്ന ഇടത്ത്, പഠിക്കുന്ന സ്ഥലങ്ങളിൽ,…. നമ്മുടെ അതിരുകളെക്കുറിച്ച് നല്ല ബോധ്യം ഉണ്ടായിരിക്കണം. ജോലിയോടുള്ള ബന്ധത്തിലും പഠനത്തോടുള്ള ബന്ധത്തിലും വീടുവട്ട്, രാജ്യംവിട്ട് പോകുന്ന കുഞ്ഞുങ്ങളോട് ഞാൻ എന്നും പറയുന്ന ഒരു ഉപദേശമാണ് ഇത്. നമ്മുക്കു ലഭിച്ചിരിക്കുന്ന സ്വാതന്ത്ര്യം അതിരുകൾ ലംഘിക്കാനുള്ള അവസരമായി കാണരുത്, മറിച്ച് നമ്മുടെ അതിരുകൾ കൂടുതൽ ബലപ്പെടുത്തുവാനുള്ള സാധ്യതകളാക്കി മാറ്റണം.
അതിരുകൾ ലംഘിച്ചാൽ ജീവിതത്തിൽനിന്നും (കുടുംബത്തിൽനിന്നും) ദൈവസാന്നിധ്യം നഷ്ടപ്പെടും, അങ്ങനെ സംഭവിച്ചതുകൊണ്ട് സാത്താൻ തകർത്തുകളഞ്ഞ ജീവിതങ്ങൾ നിരവധി ഉണ്ട്. ആ പട്ടികയിൽ പേർ ചേർക്കേണ്ടതിന്നുവേണ്ടിയല്ല ദൈവം നമ്മെ വിളിച്ചിരിക്കുന്നത്.
പ്രിയരേ, നമ്മൾ കർത്താവിനെ ഹൃദയപൂർവ്വം സ്നേഹിക്കുന്നുവെങ്കിൽ അവൻ്റെ ഉപദേശങ്ങൾ (അതിരുകൾ) ഒന്നും കഠിനമായി തോന്നുകയില്ല. യോഹന്നാൻ 14:15, 21 “എൻ്റെ കല്പനകൾ ലഭിച്ചു പ്രമാണിക്കുന്നവൻ എന്നെ സ്നേഹിക്കുന്നവൻ ആകുന്നു; എന്നെ സ്നേഹിക്കുന്നവനെ എൻ്റെ പിതാവു സ്നേഹിക്കുന്നു; ഞാനും അവനെ സ്നേഹിച്ചു അവന്നു എന്നെത്തന്നേ വെളിപ്പെടുത്തും”
ജീവിതത്തിലെ ചില പരീക്ഷകൾക്കു മുമ്പിൽ, ചില പ്രതിസന്ധികൾക്കു മുമ്പിൽ, ഒരുപക്ഷേ, ഇനി എനിക്കു പിടിച്ചു നിൽക്കാൻ കഴിയില്ല എന്നു തോന്നിയേക്കാം. വിഷമിക്കേണ്ട, കർത്താവിനെ കൂടുതൽ സ്നേഹിച്ചാൽമതി, വിഷയങ്ങളുടെ മദ്ധ്യത്തിൽ കർത്താവ് തന്നെത്തന്നെ വെളിപ്പെടുത്തും. സ്തോത്രം !
*പ്രാർത്ഥിക്കാം*
ഞങ്ങളെ സ്നേഹിക്കുന്ന നല്ല പിതാവേ, തിരുവചനങ്ങൾക്കായി നന്ദി പറയുന്നു. വചനത്തിൻ്റെ ഉപദേശങ്ങൾ തിരിച്ചറിഞ്ഞ്, എൻ്റെ അതിരുകളെക്കുറിച്ച് കൂടുതൽ ബോധ്യത്തോടുകൂടെ ജീവിക്കുവാൻ കൃപ തരേണമേ. കർത്താവിനെ കൂടുതൽ സ്നേഹിച്ച് നാൾതോറും എൻ്റെ അതിരുകളെ ബലപ്പെടുത്തുവാൻ സഹായിക്കണേ. തിരുവചനത്തിനുമുമ്പിൽ എന്നെ പൂർണ്ണമായി സമർപ്പിക്കുന്നു.
യേശുവിൻ്റെ നാമത്തിൽ പ്രാർത്ഥന സ്വീകരിക്കേണമേ, *ആമേൻ*
പ്രാർത്ഥനയോടെ,
ഭോപ്പാലിലെ വചനമാരിയിൽനിന്ന്
ഷൈജു ബ്രദർ (Mob: 9424400654)
*കുറിപ്പ്*:
നിങ്ങളുടെ വിശ്വാസജീവിതത്തിൽ പ്രത്യാശനൽകുന്ന അനുദിന ധ്യാനചിന്തകൾ വചനമാരിയിൽ നിന്ന് കൃത്യമായും കൃമമായും ലഭിക്കുവാൻ ഞങ്ങളുടെ വാട്സ് ഗ്രൂപ്പിൽ അംഗമാകുക. ഈ വാഗ്ദത്ത സന്ദേശം അനുഗ്രഹമായെങ്കിൽ മറ്റുള്ളവർക്കും അയച്ചുകൊടുക്കുക. നിങ്ങളുടെ പ്രാർത്ഥനാ വിഷയങ്ങൾ അറിയിക്കുവാൻ, വചനമാരി പ്രാർത്ഥനാ കെയർ ലേക്ക് വിളിക്കാവുന്നതാണ് Ph: 0755 4297672, Mob: 7898211849, 9589741414, 7000477047
*കർത്താവിൽ പ്രിയരേ*,
വചനമാരി ആത്മീയ സന്ദേശങ്ങൾ നിങ്ങൾക്ക് അനുഗ്രഹമാകുന്നുണ്ട് എന്നു വിശ്വസിക്കുന്നു. ഈ സന്ദേശം മലയാളം, ഇംഗ്ലീഷ്, ഹിന്ദി ഭാഷകളിൽ നിങ്ങൾക്ക് അയച്ചുതരുന്നതിന് കാരണം, ഈ സന്ദേശം പ്രയോജനപ്പെടുമെന്ന് നിങ്ങൾ കരുതുന്നവർക്കുകൂടെ ഷെയർ ചെയ്യുന്നതിനുവേണ്ടിയാണ്. ഹിന്ദി അറിയുന്നവർക്ക്, വിദേശങ്ങളിൽ ആയിരിക്കുന്ന, മലയാളം വായിക്കാൻ അറിയാത്ത കൊച്ചുമക്കൾക്ക് ഒക്കെ ഇത് പ്രയോജനപ്പെടാം. തക്ക സമയത്ത് ലഭിച്ച ദൈവാലോചന ജീവിതത്തിൽ വലിയ രക്ഷയ്ക്ക് കാരണമായത്തീർന്ന നിരവധി സാക്ഷ്യങ്ങൾ ഉണ്ട്. അതുകൊണ്ട് ഈ സന്ദേശങ്ങൾ മറ്റുള്ളവരിലും എത്തിച്ചാലും.
ദൈവം അനുഗ്രഹിക്കട്ടെ,
ഷൈജു പാസ്റ്റർ (9424400654)
(വചനമാരി, ഭോപ്പാൽ)
