യോഹ. 10:4 “…അവൻ അവെക്കു മുമ്പായി നടക്കുന്നു; ആടുകൾ അവൻ്റെ ശബ്ദം അറിഞ്ഞു അവനെ അനുഗമിക്കുന്നു.”
കർത്താവ് നമുക്കു മുമ്പായി നടക്കുന്നതുകൊണ്ട്, അവിടുത്തെ അനുഗമിക്കുന്ന നമുക്ക് എന്തെല്ലാം നന്മകളാണ് ഉള്ളത് എന്ന് തിരുവചനവെളിച്ചത്തിൽ നമ്മൾ ധ്യാനിച്ചുകൊണ്ടിരിക്കുകയാണല്ലോ !
*(4)* യെശ. 45:2 “ *ഞാൻ നിനക്കു മുമ്പായി ചെന്നു* ദുർഘടങ്ങളെ നിരപ്പാക്കുകയും താമ്രവാതിലുകളെ തകർത്തു ഇരിമ്പോടാമ്പലുകളെ ഖണ്ഡിച്ചുകളകയും ചെയ്യും.”
താമ്രവാതിലുകൾ, ഇരുമ്പോടാമ്പലുകൾ (Doors of brass and Iron bars) എന്നാൽ; മുറിക്കുവാനോ തകർക്കുവാനോ ഏറ്റവും ദുഷ്കരമായ ധാതുക്കളാണ് ഇവ. ഏറ്റവും കഠിനമായത്, ഏറ്റവും പ്രയാസമേറിയത്, ഏറ്റവും അസാധ്യമായത്, ഏറ്റവും അസഹനീയമായത്, ഏറ്റവും വേദനാജനകമായത്, ഏറ്റവും ഗുരുതരമായത്, ഏറ്റവും വിഷമംപിടിച്ചത്….. താമ്രവാതിലുകൾക്കും, ഇരുമ്പോടാമ്പലുകൾക്കും സമമായി നമ്മുടെ ജീവിതത്തെ ഞെരുക്കിക്കൊണ്ടിരിക്കുന്ന വിഷയങ്ങൾ എന്തുമാകട്ടെ അവ എല്ലാം ഖണ്ഡിച്ചുകളകയുവാനും, തകർത്തുകളയുവാനും ജയോത്സവമായി നമ്മെ നടത്തുവാനുംവേണ്ടിയാണ് കർത്താവ് നമുക്കുമുമ്പായി നടക്കുന്നത്.
ദുർഘടങ്ങളെ മോശസമയമായിട്ടാണ് അപ്പൊസ്തലനായ പൗലൊസ് തിമൊഥെയൊസിന് എഴുതിയ ലേഖനത്തിൽ പറയുന്നത് (2 തിമൊ. 3:1 “അന്ത്യകാലത്തു ദുർഘടസമയങ്ങൾ വരും എന്നറിക”).
ദുർഘടങ്ങൾ എന്നാൽ ഇരുട്ടിൻ്റെ അനുഭവങ്ങളാണ് എന്ന് യെശ. 42:16 വചനത്തിൽ വായിക്കുന്നു (“ഞാൻ കുരുടന്മാരെ അവർ അറിയാത്ത വഴിയിൽ നടത്തും; അവർ അറിയാത്ത പാതകളിൽ അവരെ സഞ്ചരിക്കുമാറാക്കും; ഞാൻ അവരുടെ മുമ്പിൽ ഇരുട്ടിനെ വെളിച്ചവും ദുർഘടങ്ങളെ സമഭൂമിയും ആക്കും; ഞാൻ ഈ വചനങ്ങളെ വിട്ടുകളയാതെ നിവർത്തിക്കും”)
അതായത്, ഇരുട്ടിന് സമമായ, മോശസമമായ അനുഭവങ്ങൾ ജീവിതത്തിൽ വരുമ്പോൾ, വീണുപോകാതെ, താളടിയായിപോകാതെ ജയോത്സവമായി നമ്മെ നടത്തുവാനാണ് കർത്താവ് നമുക്കു മുമ്പായി നടക്കുന്നത്. സ്തോത്രം !
*(5)* പുറപ്പാട് 33:2 “പാലും തേനും ഒഴുകുന്ന ദേശത്തേക്കു, തന്നേ, പോകുവിൻ. ഞാൻ ഒരു ദൂതനെ നിനക്കു മുമ്പായി അയക്കും; കനാന്യൻ, അമോർയ്യൻ, ഹിത്യൻ, പെരിസ്യൻ, ഹിവ്യൻ, യെബൂസ്യൻ എന്നിവരെ ഞാൻ ഓടിച്ചുകളയും.”
ദൈവം വാഗ്ദത്തംചെയ്ത കനാൻദേശത്തേക്ക് യിസ്രായേൽ ജനത്തിനെ എത്തിക്കേണ്ടതിനും, ആ വാഗ്ദത്തദേശം അവർക്ക് അവകാശമായി നൽകേണ്ടതിന്നുംവേണ്ടി സ്വർഗ്ഗത്തിലെ ദൈവം തൻ്റെ ദൂതനെ അവർക്കു മുമ്പായി അയച്ചതുപോലെ; നമ്മുടെ ജീവിതത്തിൽ കർത്താവ് ദർശനംതന്ന (അരുളിച്ചെയ്തിട്ടുള്ള) വാഗ്ദത്തങ്ങൾ നിവർത്തിയാകേണ്ടതിനും, ആ വാഗ്ദത്തനിവർത്തിക്ക് എതിരായി നില കൊള്ളുന്ന സകല തടസ്സങ്ങളും മാറ്റി, അവ നമ്മുടെ ജീവിതത്തിൽ അനുഭവമായി മാറ്റേണ്ടതിനും വേണ്ടിയാണ് കർത്താവ് തൻ്റെ ദൂതനെ നമുക്കു മുമ്പായി അയക്കുന്നത്.
*(6)* ആവർത്തന. 31:8 “യഹോവതന്നേ നിനക്കു മുമ്പായി നടക്കുന്നു; അവൻ നിന്നോടു കൂടെ ഇരിക്കും; നിന്നെ കൈവിടുകയില്ല, ഉപേക്ഷിക്കയുമില്ല; നീ പേടിക്കരുതു, ഭ്രമിക്കയുമരുതു.”
വിശ്വാസ ജീവിതത്തിൽ നമ്മെ പേടിപ്പെടുത്തുന്ന അനുഭവങ്ങളും, സംഭവങ്ങളും, വ്യക്തികളും, സാഹചര്യങ്ങളും ഉണ്ടാകുമ്പോൾ, നമ്മെ ഒരുനാളും കൈവിടുകയില്ല, ഒരുനാളും ഉപേക്ഷിക്കയില്ല എന്ന ഉറപ്പ് തരുന്നതിനുവേണ്ടിയാണ് കർത്താവ് നമുക്കു മുമ്പായി സഞ്ചരിക്കുന്നത്.
ഈ നല്ല കർത്താവിനെ അനുഗമിക്കുവാൻ ഭാഗ്യം ലഭിച്ച നമ്മുക്ക് നന്ദിയോടെ കർത്താവിന് സ്തോത്രയാഗങ്ങൾ അർപ്പിക്കാം.
പ്രാർത്ഥനയോടെ,
ഷൈജു പാസറ്റർ (9424400654)
ഭോപ്പാൽ, മധ്യപ്രദേശ്
കർത്താവ് നമുക്കുമുമ്പായി നടക്കുന്നു. ഈ ധ്യാനചിന്തകളുടെ അടുത്തഭാഗം ഉടനെ അയക്കുന്നതായിരിക്കും (വചനമാരി വെബ്സൈറ്റിലും വായിക്കാവുന്നതാണ്).
പ്രാർത്ഥനാ വിഷയങ്ങൾ അറിയിക്കുവാൻ വിളിക്കേണ്ട നമ്പർ 7898211849, 9589741414
