എൻ്റെ ദൈവം

നമ്മുടെ വാക്കുകളിലും സംസാരങ്ങളിലും സാധാരണയായി ഉപയോഗിക്കാറുള്ള ചില പദങ്ങൾ, അതു കേൾക്കുന്നവരുടെ ഉള്ളിൽ ഉണ്ടാക്കുന്ന ചില പ്രത്യാഘാതങ്ങൾ അതിശയിപ്പിക്കുന്നതായിരിക്കും.

ഒരു മകൻ തന്‍റെ പിതാവിനെ മറ്റുള്ളവർക്ക് പരിചയപ്പെടുത്തുമ്പോൾ 'ഇത് അപ്പനാണ്' എന്നു പറയുന്നതും '*ഇത് എൻ്റെ അപ്പനാണ്*' എന്നു പറയുന്നതും തമ്മിൽ കേൾവിക്കാര്‍ക്ക് വലിയ വ്യത്യാസമൊന്നും തോന്നില്ലെങ്കിലും, ആ അപ്പൻ്റെ മനസ്സിൽ അതു ആഴത്തില്‍ ചലനങ്ങൾ സൃഷ്ടിക്കും. *എൻ്റെ* എന്ന വാക്കു ചേർക്കുമ്പോൾ ഉണ്ടാകുന്ന ദൃഢത ഒന്നു വേറെതന്നെയാണ്.

സ്വർഗ്ഗീയ പിതാവിൻ്റെ ഹൃദയത്തെപോലും സ്പർശിക്കാൻ ഈ വാക്കുകൾക്കു കഴിയും എന്നുള്ളതിന് നിരവധി ഉദാഹരണങ്ങൾ വിശുദ്ധ വേദപുസ്തകത്തിൽ നമുക്കു കാണുവാൻ കഴിയും. അതിൽ ഒരു ഉദാഹരണമാണ് മുകളിലെ കുറിവാക്യത്തില്‍ നമ്മൾ വായിക്കുന്നത്. രൂത്ത് എന്ന മോവാബ്യ സ്ത്രീ യിസ്രായേലിൻ്റെ പരിശുദ്ധനെ *എൻ്റെ ദൈവം* എന്നു വിളിച്ചപ്പോൾ അവളുടെ ചരിത്രം മാറി. ആ ഒരു വിളി അവളുടെ കുടുംബത്തിൻ്റെ തലവരതന്നെ മാറ്റി. സത്യദൈവത്തെ 'എൻ്റെ ദൈവം' എന്നു വിളിച്ചുകൊണ്ട് ഒരു പുതിയ ജീവിതം ആരംഭിച്ച രൂത്തിൻ്റെ ജീവിതത്തിൽ പിന്നീട് സംഭവിച്ചത് അത്ഭുതങ്ങളാണ്. മത്തായി 1:5 വാക്യത്തിൽ ദൈവപുത്രനായ യേശുക്രിസ്തുവിൻ്റെ വംശാവലി പട്ടികയിൽ വരെ പേരു ചാർത്തപ്പെടുവാൻ 'എൻ്റെ ദൈവം' എന്ന അവളുടെ വിളിക്കു കഴിഞ്ഞു എന്നുള്ളതാണ് വാസ്തവം.

ഒരു യോഗ്യതയുമില്ലാതിരുന്ന രൂത്തിന് അതു സാധിച്ചു എങ്കില്‍, ഈ സന്ദേശം വായിക്കുന്ന പ്രിയരേ, ഇനിയും എന്തിനു താമസിക്കുന്നു, സ്വർഗ്ഗത്തിലേക്ക് കണ്ണുകളും കരങ്ങളും ഉയര്‍ത്തി, നുറുങ്ങിയ ഹൃദയത്തോടെ കർത്താവിനെ, 'എൻ്റെ ദൈവമേ' എന്ന് വിളിച്ച് സ്വന്തമാക്കിക്കൂടെ?

(യോഹന്നാൻ 20:28 "..എൻ്റെ കർത്താവും എന്‍റെ ദൈവവും ആയുള്ളോവേ..")

ആത്മാർത്ഥതയോടെയാണ് അതു വിളിക്കുന്നതെങ്കിൽ ദൈവം നമ്മില്‍ പ്രസാദിക്കും. നമ്മുടെ ചരിത്രവം ഭൂമിശാസ്ത്രവും എന്തുമായാലും അതു ദൈവത്തിന് ഒരു പ്രശ്നമല്ല, യേശുവിനെ സ്വന്തമാക്കുന്ന നാൾ മുതല്‍ നമ്മുടെ ചരിത്രവും തലവരയും മാറും, അവന്‍ മാറ്റും.

*ചില ഉദാഹരണങ്ങൾ തിരുവചനത്തില്‍ നിന്ന് ഞാൻ ഓർമ്മിപ്പിക്കാം;*

1) സ്വർഗ്ഗത്തിലെ ദൈവത്തെ *എൻ്റെ ദൈവം* എന്ന് വിളിച്ച ഒരു ജനതയെ ദൈവം അവരുടെ അടിമത്വത്തിൽ നിന്ന് വിടുവിച്ച്, അവരുടെ ശത്രുക്കളെ കടലില്‍ മുക്കിക്കളഞ്ഞ്, അവരെ പാലും തേനും ഒഴുകുന്ന ദേശത്ത് എത്തിച്ചു. പുറപ്പാട് 15:2

"എൻ്റെ ബലവും എൻ്റെ ഗീതവും യഹോവയത്രേ; അവൻ എനിക്കു രക്ഷയായ്തീർന്നു. അവൻ *എൻ്റെ ദൈവം*; ഞാൻ അവനെ സ്തുതിക്കും; അവൻ എൻ്റെ പിതാവിൻ ദൈവം; ഞാൻ അവനെ പുകഴ്ത്തും"

2) സ്വർഗ്ഗത്തിലെ ദൈവത്തെ *എൻ്റെ ദൈവം* എന്ന് വിളിച്ച് ആ ദൈവത്തോട് പറ്റിനിന്ന കാലേബ് എന്ന ഭക്തന് വാഗ്ദത്ത നിവർത്തി ലഭിച്ചു. (വാഗ്ദത്ത നാട്ടില്‍ അവകാശം ലഭിച്ചു).

സ്വർഗ്ഗ നാട്ടിലെ നിത്യഭവനത്തിൽ അവകാശവും പ്രതിഫലവും ലഭിക്കേണ്ടതിന് 'എൻ്റെ ദൈവം' എന്നു വിളിച്ച് ദൈവത്തോട് പറ്റി നിന്നുകൊൾക. യോശുവ 14:8

"എന്നോടുകൂടെ പോന്നിരുന്ന സഹോദരന്മാർ ജനത്തിൻ്റെ ഹൃദയം ഉരുകുമാറാക്കി; ഞാനോ *എൻ്റെ ദൈവമായ* യഹോവയോടു പൂർണ്ണമായി പറ്റിനിന്നു"

3) സ്വർഗ്ഗത്തിലെ ദൈവത്തെ *എൻ്റെ ദൈവം* എന്ന് വിളിച്ച ദാവീദിനെ അവന്‍റെ ശത്രുക്കളുടെ കയ്യില്‍നിന്ന് വിടുവിച്ച് ശൗലിന്‍റെ കുന്തമുനയില്‍ നിന്ന് രക്ഷിച്ചപ്പോൾ അവൻ ഇപ്രകാരം ദൈവത്തെ പാടിസ്തുതിച്ചു. 2 ശമുവേല്‍ 22:30

"നിന്നാൽ ഞാൻ പടക്കൂട്ടത്തിൻ്റെ നേരെ പാഞ്ഞുചെല്ലും; *എൻ്റെ ദൈവത്താൽ* ഞാൻ മതിൽ ചാടിക്കടക്കും"

4) സ്വർഗ്ഗത്തിലെ ദൈവത്തെ *എൻ്റെ ദൈവം* എന്ന് വിളിച്ച മോശെയെ ദൈവം മാനിച്ചു, ലോക നേതാവാക്കി, ദൈവത്തിൻ്റെ പ്രതിപുരുഷനാക്കി, സീനായി പര്‍വ്വതത്തിൽ ദൈവത്തോടൊപ്പം 40 ദിവസങ്ങൾ വസിക്കാൻ അനുഗഹം ലഭിച്ചു, അവൻ യഹോവയെ അഭിമുഖമായി അറിഞ്ഞു,... സങ്കീർ. 91:2

"യഹോവയെക്കുറിച്ചു: അവൻ എൻ്റെ സങ്കേതവും കോട്ടയും ഞാൻ ആശ്രയിക്കുന്ന *എൻ്റെ ദൈവവും* എന്നു പറയുന്നു"

5) സ്വർഗ്ഗത്തിലെ ദൈവത്തെ *എൻ്റെ ദൈവം* എന്ന് വിളിച്ച കോരഹ് പുത്രന്മാരെ ദൈവം കൈവിട്ടില്ല, മാതാപിതാക്കളും സ്വന്തക്കാരും പ്രിയപ്പെട്ടവരും നഷ്ടപ്പെട്ട അവരുടെ സങ്കടത്തിൻ്റെ നാളുകളിൽ ദൈവം അവരോടെ കൂടെ ഇരുന്നു. അവർ ദൈവത്തെ 'എൻ്റെ ദൈവം' എന്നുവിളിച്ച് ദൈവത്തിൻ്റെ പക്ഷത്ത് നിന്നില്ലായിരുന്നു എങ്കിൽ, അവർ ജീവനോടെ ഉണ്ടാകുമായിരുന്നില്ല. ആ നല്ല ബോധ്യം ഉണ്ടായിരുന്നതുകൊണ്ടാണ് അവർ യഹോവയായ കർത്താവിനെ 'എൻ്റെ ദൈവം' 'എൻ്റെ ദൈവം' എന്ന് ആവര്‍ത്തിച്ചാവർത്തിച്ച് വിളിക്കുന്നതായി നമ്മൾ തിരുവചനത്തിൽ വായിക്കുന്നത്. സങ്കീർ. 42: 5, 11, 43:5..

"..ദൈവത്തിൽ പ്രത്യാശ വെക്കുക; അവൻ എൻ്റെ മുഖപ്രകാശകരക്ഷയും *എൻ്റെ ദൈവവുമാകുന്നു* എന്നിങ്ങനെ ഞാൻ ഇനിയും അവനെ സ്തുതിക്കും"

6) സ്വർഗ്ഗത്തിലെ ദൈവത്തെ *എൻ്റെ ദൈവം* എന്ന് വിളിച്ച ശലോമോനെ ആ ദൈവം മഹാജ്ഞാനിയും ബഹുസമ്പന്നനുമാക്കി. 1 രാജാ. 3:7

"*എൻ്റെ ദൈവമായ* യഹോവേ, നീ അടിയനെ ഇപ്പോൾ എന്റെ അപ്പനായ ദാവീദിന്നു പകരം രാജാവാക്കിയിരിക്കുന്നു. ഞാനോ ഒരു ബാലനത്രേ; കാര്യാദികൾ നടത്തുവാൻ എനിക്കു അറിവില്ല"

7) സ്വർഗ്ഗത്തിലെ ദൈവത്തെ *എൻ്റെ ദൈവം* എന്ന് വിളിച്ച ദാനിയേലിനെ സിംഹങ്ങളുടെ ഗുഹയില്‍ സ്വസ്ഥമായി ഉറങ്ങുമാറാക്കിയ ദൈവം ഇന്നും ജീവിക്കുന്നു. ബലശാലികളായ സിംഹങ്ങൾ കുഞ്ഞാട്ടിൻ കുട്ടികളായ ആ രാത്രിയില്‍, പക്ഷേ രാജാവിന് തന്‍റെ അന്ത:പുരത്തിൽ കിടന്നുറങ്ങാൻ കഴിഞ്ഞില്ല. ദാനിയേല്‍ 6:22

"സിംഹങ്ങൾ എനിക്കു കേടുവരുത്താതിരിക്കേണ്ടതിന്നു *എൻ്റെ ദൈവം* തന്റെ ദൂതനെ അയച്ചു അവയുടെ വായടെച്ചുകളഞ്ഞു; അവന്റെ സന്നിധിയിൽ ഞാൻ കുറ്റമില്ലാത്തവൻ; രാജാവേ, തിരുമുമ്പിലും ഞാൻ ഒരു ദോഷവും ചെയ്തിട്ടില്ല എന്നു ഉണർത്തിച്ചു"

സ്വർഗ്ഗത്തിലെ ദൈവത്തെ 'എൻ്റെ ദൈവം' എന്നു വിളിച്ച് സ്വന്തമാക്കുകയും, തൽഫലമായി ജീവിതത്തിൽ ധാരാളം അനുഗ്രഹങ്ങളും വിടുതലും പ്രാപിക്കയും ചെയ്തിട്ടുള്ള നിരവധി പേരുടെ ചരിത്രം വേദപുസ്തകത്താളുകളില്‍ രേഖപ്പെടുത്തിയിട്ടുണ്ട്. *അവയിൽ നിന്ന് ചിലതുമാത്രം പരിശുദ്ധാത്മാവിൻ്റെ പ്രേരണയാൽ ഞാൻ ഇവിടെ ഓർമ്മിപ്പിച്ചതിനു കാരണം, ഈ സന്ദേശം വായിക്കുന്ന ചിലരോട് ദൈവാത്മാവിന് ചില ആലോചനകൾ അറിയിക്കുവാൻ ഉള്ളതുകൊണ്ടാണ്*.

അവരത് ഏറ്റെടുക്കുമെങ്കിൽ മൂന്നു അനുഗ്രഹങ്ങൾ അവർക്കുണ്ടാകും

*(1) അവരുടെ പ്രാർത്ഥന ദൈവം കേൾക്കും*. മീഖാ 7:7

"ഞാനോ യഹോവയിങ്കലേക്കു നോക്കും; എൻ്റെ രക്ഷയുടെ ദൈവത്തിന്നായി കാത്തിരിക്കും; *എൻ്റെ ദൈവം എൻ്റെ പ്രാർത്ഥന കേൾക്കും*"

*(2) അവരുടെ ബുദ്ധിമുട്ടുകൾ എല്ലാം ദൈവം മാറ്റും*. ഫിലി. 4:19

"*എൻ്റെ ദൈവമോ* നിങ്ങളുടെ ബുദ്ധിമുട്ടു ഒക്കെയും മഹത്വത്തോടെ തൻ്റെ ധനത്തിന്നൊത്തവണ്ണം ക്രിസ്തുയേശുവിൽ പൂർണ്ണമായി തീർത്തുതരും"

*(3) അവർ ജീവനോടിരുന്ന് ദൈവത്തിന്‍റെ വിശ്വസ്തത വർണ്ണിക്കും*. ഹബക്കൂ. 1:12

"*എൻ്റെ ദൈവമായ* യഹോവേ, നീ പുരാതനമേ എൻ്റെ പരിശുദ്ധനല്ലയോ? ഞങ്ങൾ മരിക്കയില്ല;.."

*ഈ വിശുദ്ധ വചനങ്ങളാൽ ദൈവം നിങ്ങളെ അനുഗ്രഹിക്കുമാറാകട്ടെ*,

പ്രാർത്ഥനയോടെ,

(ബ. ഷൈജു ജോൺ

വചനമാരി, ഭോപ്പാല്‍ 7898211849

*കുറിപ്പ്*:

നിങ്ങളുടെ വിശ്വാസജീവിതത്തിൽ പ്രത്യാശനല്‍കുന്ന അനുദിന ധ്യാനചിന്തകൾ വചനമാരിയിൽ നിന്ന് കൃത്യമായി / കൃമമായി ലഭിക്കുവാൻ ഞങ്ങളുടെ വാട്സ് ഗ്രൂപ്പില്‍ അംഗമാകുക. ഈ വാഗ്ദത്ത സന്ദേശം അനുഗ്രഹമായെങ്കിൽ മറ്റുള്ളവര്‍ക്കും അയച്ചുകൊടുക്കുക.

പ്രാർത്ഥനാ വിഷയങ്ങൾ അറിയിക്കുവാൻ, വചനമാരി പ്രാർത്ഥനാ കെയർ ലേക്ക് വിളിക്കാവുന്നതാണ് Ph: 0755 4297672, Mob: 9424400654, 7898211849, 9589741414, 7000477047