കർത്താവു നമ്മുടെ വാതിലായി ഉണ്ട്

    യോഹ. 10:7 “…ആമേൻ, ആമേൻ, ഞാൻ നിങ്ങളോടു പറയുന്നു: ആടുകളുടെ വാതിൽ ഞാൻ ആകുന്നു.”

     കർത്താവിന് തൻ്റെ മക്കളോട് എത്രമാത്രം പ്രിയമുണ്ട് എന്ന് ബോധ്യപ്പെടുത്തുവാൻ, ഒരു ഇടയനും തൻ്റെ ആടുകളുമായുള്ള ബന്ധത്തെ സാദൃശ്യപ്പെടുത്തിക്കൊണ്ടാണ് യോഹന്നാൻ്റെ സുവിശേഷം 10 അധ്യായത്തിൻ്റെ ഒന്നു മുതൽ ആറുവരെയുള്ള വാക്യങ്ങൾ കർത്താവ് അരുളിച്ചെയ്തിരിക്കുന്നത്. എന്നാൽ അവിടുന്ന് പറഞ്ഞത് അവർക്ക് ഗ്രഹിക്കാൻ കഴിയാകയാൽ, കൂടുതൽ തെളിമയോടെ അവർക്ക് വ്യക്തമാകുന്ന രീതിയിൽ കർത്താവ് പറഞ്ഞ വാക്കുകളാണ് മുകളിൽ രേഖപ്പെടുത്തിയിരിക്കുന്നത് (ആമേൻ, ആമേൻ, ഞാൻ നിങ്ങളോടു പറയുന്നു: ആടുകളുടെ വാതിൽ ഞാൻ ആകുന്നു).

     കർത്താവാണ് അവിടുത്തെ ആടുകളുടെ വാതിൽ. ഈ വാക്കുകൾ ദൈവമക്കളാകുന്ന നമുക്ക് നൽകുന്ന ആശ്വാസവും പ്രത്യാശയും എത്ര അധികമാണ് എന്ന് വാക്കുകളാൽ വിവരിക്കാവുന്നതല്ല. കാരണം കർത്താവാകുന്ന വാതിൽ കടന്നിട്ടുവേണം ഏതൊരാൾക്കും ദൈവമക്കളുടെ ജീവിതത്തിൽ പ്രവേശിക്കുവാൻ കഴികയുള്ളൂ. മോഷ്ടിപ്പാനും അറുപ്പാനും മുടിപ്പാനും തക്കം നോക്കിയിരിക്കുന്ന കള്ളന്മാരുടെ ഈ ലോകത്ത്, യേശുകർത്താവ് നമ്മുടെ വാതിലായി ഉള്ളതാണ് നമ്മുടെ ബലം. സ്തോത്രം !

    ഉൽപ്പ. 4:7 വാക്യത്തിൽ വായിക്കുന്നതുപോലെ വാതിക്കൽ കിടക്കുന്ന സാത്താന്യ ശക്തികളുണ്ട്. അവ അകത്തുപ്രവേശിക്കുവാൻ അവസരംനോക്കി കിടപ്പാണ്. കർത്താവ് വാതിലായി ഇല്ലാത്ത ജീവിതങ്ങൾക്ക് അവയെ തടഞ്ഞു നിർത്താൻ കഴിയില്ല. അവ പ്രവേശിക്കുന്ന ജീവിതങ്ങളും കുടുംബങ്ങളും മുടിഞ്ഞുപോകുന്നതായി കാണുന്നു.